H Lalchhuanliana
Chief Minister Pu Lalduhoma chuan kumin January ni riat khan ZPM chhung inkhawmah Delhi-a a zin report leh thil hrang hrang a sawi a. A tlang kawmnan Opposition party zawng zawngte chu chona thianghlima cho a duh thu a sawi a ni. Pu Lalduhoma chuan mipui beisei an phak theihnan an party mite chu mipuite kawng dika hruaitu ni tura chahin ruling party tha tak leh entawn tlak ni turin a fuih a, an hna thawh pawh a tha tur a ni a ti . Minister-te leh MLA te, sawrkar lam leh party lam amite pawh theihtawp chhuah turin a chah bawk a ni. An sawrkar chuan sawrkar hmasa hna thawh that chu an chhunzawm zel tur thute, an lo thawh that vak loh thlenga maimitchhing chunga an chhunzawm mek a awm thute thlengin a sawi a nih kha.
Kan CM chuan sawrkarna an chan hnu lawka Pu Nitin Gadkari, Central Minister, Ministry of Road Transport & Highways (MORTH) changtu nen an inbiak thute a sawi a. Central Minister chuan CM chu kan rama kawng laih hna a chhiat thute, kan thawh chak loh thute, pawisa kan hman muan thute chu hrilhin na takin a rawn nawr tihte a sawi bawk a. CM chuan Central Minister lungawi lohna thu chu a pawm thu leh Central Minister hnenah chuan sawrkar hmasa hminga thupha a chawi thu leh ngaihdam a dilsak thu thlengin a sawi a ni. Chutih rual erawh chuan kan CM chuan a sawrkar thar chuan Union Minister duh dan anga hna an thawh tur thute, an hnathawh (achievement) atanga lo teh turte, a kaihhruai sawrkar chu an danglam tur thute leh kum khat chhunga an hnathawh lo en turin a tiam tihte a sawi bawk a. CM chuan hna chak zawka an thawhna tura an mamawh sum an dilte chu pe chhuak turin a dil nghala, a tukah Aizawl Eastern Bye-pass road laihna tur, sawrkar hmasain hma a lo lak tawhna chu a lo sanction nghal thu a sawi bawk a ni.
Pu Lalduhoma thusawi tlemte kan tar lan atang leh Central Minister a dawrna atanga lo lang chu, kan rama hmasawnna hnathawh hi a tha tawk lo hle tih hi a ni. Hun hmasa lama NHIDCL hnathawktute kan lo vilpui loh vanga nasa taka kan ram ngaw an suasam te, mi tam tak ram an tihchhiat thu chanchin bua lo langte kha Central Minister thusawi hian a rawn nemnghet a ni. Central Minister meuhin kan hna thawh that loh thu kan CM a lo hrilh a, thupha chawi leh ngaihdam dil hial ngai hi a zahthlakin a thangtlawm thlak hle a, sawrkar tharah chuan hetiang hi thleng nawn lul tawh suh se. Ram hmangaihna tak tak tel lova sum leh pai uma hna thawh tam lutuk hi kan ram thanmawhbawk a ni rei tawh hle mai, rinawmna nen hna i thawk tawh ang u. Central atanga hmasawnna tur pawisa kan dawn hi dik taka hman ni se a tlem loh thu hi sawi a ni fo thin. Mawlmang deuhin han sawi ila, Kohhran hrang hrangte pawisa hman ang hian kan pawisa hmuhte hi a nihna tur taka hman ni thin se, hnathawh a tha sawt ang a, kan leiba pawh hi a tlem phah ngei ang. Induhsakna dik lo avanga a thawktu tur dik tak (competent) ni lovin hna an thawk thinte, hna hralh chhawn tam lutuk an sawi fo thinte hi a chhan langsar zual a ni ang. Kan sawrkar thar hian heng zawng zawng tireh tur hian hma han la se, chu chu mipuiin an beisei leh rorelna an kuta an pek chhan pawh a ni e. Kan beisei anga hna an thawh theih nan mipuite pawhin sawrkar tawiawma finchhuah hi kan tihtur a ni ang.
Kan CM-in an party mite hnena ruling party tha leh mahni awmna veng theuha mipuite kawng dik kawhhmuhtu ni tura a chah kha a pawimawh hle mai. Zep nak emaw, hun kal tawh lamah khan mipuiin kan nin em em thin chu, ruling party-mi inlulingte, contract hna chuhhelh takte, sawrkar hnathawkte sawn tura vau chingte kha an ni fo, an party hmai tibaltu an ni thin. Kalphung thar sawrkarah chuan party mite hian sawrkarna in chan chhan hre reng ula, hna thawh tur leh transfer thuahte hian lo hmanhlel nghal ngawt suh u, ram hlui zia, in kalsan tur a nih kha hre reng ang che u. Kan ram siam tha tur hian mahni inhaivur a thiang lova, ringtu kan nih anga Pathian ram leh a felna kan zawn hmasak tak tak ngat chuan malsawmna leh hausakna thlengin kan ta a ni tih hi rin ngam tur a ni ang . Hausa deuhte phei hi chu lo insum deuh sela, sawrkar thar hian rethei lam hawi hian hma han la tam teh se.Hei hi Kristian ram roreltute atanga kan beisei fo thin, kan beisei ang la thleng lote zing ami niin a lang e.
CHONA THIANGHLIM CHU:- Tun hma lama Pol.Partyte kumthar office hawn ni a party hruaitu thenkhat thusawi thin chu party dang sawi chhiatna a ni fo thin. Kumina CM in party officea a thu sawi hmasak ber chu a thluk a dang ta daih mai a, a ti tak hmel hle pawhin a lang. Pathian ram leh a felna zawn hmasakte, chakna leh thil tih theihna aia Pathian thlarau pawimawh zawkna thute, thawh rimna hmanga hlawhtlinnate a nih kha, “Kalphung thar” a ni zel awm e! A thusawi tlang kawmnaah khan -Opposition party zawng zawngte chu chona thianghlima cho a duh thu a sawi a. Kumnga lo ral leh hunah ZPM party sawrkarna let thla thei tur khawpa hma la turin opposition party zawng zawngte inbuatsaih turin a sawm(cho) a nih kha.Thil tha tihah inel ila, keini aia in thawh that zawka mipuiin an duh che u chuan in tling mai ang. Chutiang ni lova tun anga kalphung hluia in kal zel chuan ZPM hi min hneh ngai tawh lovang a ti a ni. ZPM sawrkar hian kan ramah bung thar a kai a, Opposition party zawng zawng pawh hei hian beng harh se a duh thu a sawi a.Kohhran siam that hna Protestantin an thawka Kohhran a lo kal dik ta ang khan, ZPM sawrkar bung thar kai mekah hian opposition party te pawh lo tel vea thil tha tih kawnga inel turin a sawm a ni. System thaah chuan tu pawh lo sawrkar se ram rorelna a that zel tawh tur thu sawiin, party tinte chu thil tha tih kawnga tan la theuh tura a sawmna hi “Chona thianghlim” chu a ni.
Kan CM Chona thianghlim hi hriat a nuam hle mai a, thil tha ti tura siam ringtute tan phei chuan he chona hi chhan ngei tur niin a lang . Party bil rilru hi dah thain kan ram tan a ni tih hre chungin kan CM chona ang hian party tinte hi thil tha tih kawngah han inel theuh ula, hma kan sawn mai ang. Kan sawrkar thar hian rorelna dik taka kalpui an tum thu hi an sawi ngun hle mai a, rorelna an chang ta bawka, thil tihin han lantir teh se.Thu hi tisaa a chan thin loh avanga kan ram dinhmun chu tu’n kan hai loh kha! Khawvel thang zelah hian kan Politiciante hian kalsan tur leh insiam thatna tur tam tak in nei tih in hriat a tha ang. Ram hmangaihna hi a sawia sawi a tawk lova, mipui tana inpekna tak tak nen thil tihah a lang tur a ni e.