Mizoram Agricultural Marketing Board-in bana kaih (handholding) scheme hnuaia sawhthing sawngbawlna thar, Sairang Horticulture Centre-a a din chu nimin khan chief minister Lalduhoma’n a hawng.
Chief minister chuan, lo neia eizawng tamna ram ni chungin eng thlai mah kan la hmingthanpui ngai lo tih a sawi a; tunah chuan Mizoram chu Ginger Capital of India tia hriat kan ni chho tan ta a, kan loneitute thawh rah zarah kan hmingthang chho mek a. Sapthei pawh larpui thama ngah kan tum leh dawn a ni, a ti.
“Sawhthing vangin chhungkaw tam takin sum leh pai tam tak an lalut a, mipuiten pawisa an neih avangin sumdawngte tan a lo hlawk a, kohhran thawhlawm chenin a pung a. A thlawna sem kan ti tawp a, moral reformation a thleng mek a, kan thawhrim rah ngei kan tel mek hi a hlu a ni,” a ti bawk.
Sawhthing chu February ni 2 atanga lei tan leh a nih tur thu chief minister chuan a sawi a. “Sawhthing zailepna khawl leh a tihrona khawl Mizo kutchhuak eng emaw zat collection centre-a dah a, an lo hman theiha chhawpsak kan rilruk mek. Chu chuan sawhthing process-na kawngah min pui nasa hlein kan ring,” a ti bawk.
Nimina hawn tak sawhthing sawngbawlna chu an sorkarna hnuaia a process-na hmasa ber a nih thu chief minister Lalduhoma chuan a sawi a, a hmunhmain a dawl zawh avangin a tul anga tihlen tum a nih thu sawiin, sawhthing sawngbawlna a hlawhtlin leh hlawhtlin loh chu a enkawltu tura thlan Good Faith te kutah a innghat thui hle a ni, a ti bawk.
Khuanglengah Processing Unit dang din mek a nih thu te, a enkawltu turin tawnhriat nei tha tak Opickpure thlan a nih tawh thu leh, Chhingchhipa khawl hlui tuai thar a nih tawh thute pawh chief minister hian a sawi a. “Organic lama tan lak hi state dangte chunga kan len theihna remchang tak a nih avangin organic lamah sorkar hi a kal uar deuh deuh dawn a ni,” a ti.
“Nikuma sawhthing leinaa thil dik tawk lo awm ang kha a awm leh kan remti dawn lo,” Lalduhoma chuan a ti a, “Engkim dik tak zelin kan kalpui dawn,” tiin a sawi bawk a ni.
Khualzahawm C. Lalsawivunga leh Dr. KC Lalmalsawmzauva, Adviser to CM, Handholding te pawhin thu an sawi a; bialtu MLA TBC Lalvenchhunga, Adviser to CM leh Lalchhuanthanga, MLA leh official thahnem tak an tel a ni.
Sawhthing sawngbawlna chu:
8 MAMB-in Sairanga Horticulture Centre hmunhma leh building thenkhatte private company hnenah sawhthing process nan outsource turin October ni 17th 2024 khan Expression of Interest (EOI) a chhuah a. EOI chhang tute zing atang hian Good Faith, Saron veng te chu thlan chhuah an ni. MOU fel taka ziakin kum 5 chhung atan 13th January, 2025 khan a hlan a ni.
8 Good Faith hian 2025 chhungin an theih ang anga ginger processing leh marketing an kalpui mek laiin, Mizoram Agricultural Marketing Board chuan, Horticulture Centre-a Transit Godown-ah hian cheng nuai 71 sengin ginger processing line a bun leh a, Good Faith enkawl nghal tura tih a ni.
8 Sum ruahman cheng nuai 71 atangin cheng nuai 61 hman a ni tawh a. Ni zung chakna hmanga vawi khata kg 2,000 tihro theihna a awm tel bawk. Sawhthing ro hralhna hi a that avangin a tihrona khawl chak leh lian zawk mamawhna a sang hle nia sawi a ni.
CM-in sawhthing sawngbawlna a hawng Feb 2 a\angin sawhthing lei tan leh dawn: CM
