CM kilhhnawk thianfai turin Congress-in sawrkar kan chak – Zodintluanga
India rama leiba ngah ber state kan nihna dinhmun siamtha tur leh chief minister kihhnawk thianfai turin Congress party chuan sawrkar an chak tih Congress Legislature Party leader Zodintluanga Ralte chuan a sawi.
CLP leader chuan khawvel leh India ramin leiba tam zawng tehna atan state-in a thawhchhuah (GSDP) atanga chhutin an leiba percentage chu hman a ni thin tih a sawi a. Chief minister Pu Zoramthanga’n state leibat tam luat avangin tehna dik lo hmanga mipui bum phet a tum tih sawiin, tunhma anga mipui bum mai mai theih tura a ngai chu a rilru nat thlak takzet tih a sawi.
Mizoramin leiba a ngah avangin sawrkar leh tur tan a huphurh awm, tih thu sawi thin party dangten sawrkar an chak hle tho si, tia CM Pu Zoramthanga’n a sawi chu thudik a ni tih a sawi a. CM ni mek kaihhruaina hnuaiah kan state hmabak a thim dawn hle, tiin, siamthat hna thawk turin an ni chuan sawrkar an chak tih a sawi. “Chief minister hian a sum enkawl thiam loh thupmawi tumin dik lo nia a hriatreng pawh a sawi thin a, mipuite i inbum tir tawh lo ang u,” a ti.
Reserve Bank of India data-a chiang tawh (actual) hnuhnung berah Mizoram chuan GSDP atanga chhutin leiba zaa 56.7 kan nei a, India rama leiba ngah ber state kan ni tih Zodintluanga hian a sawi. “Data hnunhnung ber, 2023 budget estimate-ah GSDP atanga state leiba tura chhut chu zaa 53.1 a ni a, India rama leiba ngah ber kan ni leh dawn a. State leibat dan enin actual a chhuah hunah chuan zaa 53.1 aiin a sang ngei dawn,” a ti.
Hmasawnna hnathawhna tura tangkai taka hman a nih chuan awmze nei taka ba neih chu a pawi lo, tiin, “India rama leiba ngah ber state kan ni chunga kan ram dinhmun thlirin a lungawi thlak loh hle. Leiba tun siin hmasawnna hmuh tur a awm lo a. Chief minister duhsak zawng leh a minister chuamte an mawm em em laiin, mipui chu sawi loh minister thenkhat pawh an ro hle,” CLP leader hian a ti.
CM kilhhnawk thianfai turin Congress-in sawrkar kan chak – Zodintluanga
