ZO Re-Unification Organisation (ZORO) bultumin Chin National Front (CNF) leh Zomi – Re-Unification Organisation (ZRO) chu Inrinni khan remna kawng zawhin an inbia a. Thawh dunna tur thuthlung an ziak nghal. Myanmar tualchhung buaina kal zela inbakkaih CNF leh ZRO hi kumin May thla tir atang khan silai hial chelekin nunna pawh engemawzatin an chah phah a ni. ‘Unau hmel hai’ chu tha ti loin inremna kawng an zawh theih nan ZORO chuan hma a la a. Hemi bawhzuinaah hian Inrinni khan adviser to CM (Political), ZORO vice president ni bawk Lalmuanpuia Punte office-ah hnam aiawh pawl pahnih hi an inrem theih nan inbiakna hmasa neih a ni.
Inbiaknaah hian thu tam tak sawiho a ni a, thawhhona thuthlung hmasa siam a ni.
Chin National Front(CNF) leh Zomi Re-Unification Organisation (ZRO) chu 2024 July 27-a ZORO huaihawta inkawm khawm chuan uluk taka an sawi ho hnuah, thuthlung siam chu an pawmin an zawm tlang tih an puang a ni.
‘Zofate (Chin- Kuki-Zomi /Mizo) hi thlahtu thuhmun, tawng khat hmang (same language – different dialect), nunphung thuhmun, serh leh sang inkhawih pawlh, beiseina thuhmun vuana dam leh tlang khatah, thih leh ruam khatah ti thin unau kan ni a. Kan ram leh hnam tana hma kan lakna kawngah kan thahnemngaih luat avanga unau kan inhmu thiam lo hi pawi kan ti a, tun hnuah thleng tawh lo se kan duh. Inremna tluantling a awm theih nan a tul dan azira inbiak leh nise kan ti,’ tiin thu an dah.
CNF leh ZRO-in inremna ziak
