Coach thar hnuaia Real chak vawi khatna

Coach thar hnuaia Real chak vawi khatna
Karliamta Nilaini zan Copa del Rey last 16 match-ah Alvaro Arbeloa chuan Real Madrid manager ni chunga a match hmasaberah a team thar chu Spanish
second division club Albacete lakah a tlawmpui, Inrinni zanah a tum khatna atan Spanish La Liga match khelhpui lehin, Levante laka 2-0 hnehna nen league bul a tan a; table-ah match khata khel tam zawk chungin hmahruaitu Barcelona lakah point khat chauhin an hniam ta.
Santiago Bernabeu inkhelah hian Madrid supporter-te’n inkhel tan dawnah rawmawl var an vai nasa mai a; an match hnuhnung pahniha tlawm zawn mek an nih avangin khelmual lut tura player lo inzui chhuakte chu an boo khum hum hum a, a bik takin Jude Bellingham, Vinicius Jr leh Federico Valverde-te bakah an president Florentino Perez-te an bitum zual!
An fans lungawi lo boruak hi inkhelh banah Arbeloa chuan sawi chhuakin, “He inauhelna leh campaign lo chhuahna bul hi ka hria alawm, Real Madrid ngainalotute atanga lo irhchhuak a ni.
“Santiago Bernabeu piahlama he club chanchina mi pawimawhber president kan nei hi a lawmawm a, engkim hlawhchhuak tawh a ni,” tiin Perez thlavang a hauh.
Tarlan tawh angin, Liverpool leh Real Madrid defender hlui hian karliamta Thawhtanni mai khan an petchhuah tak Xabi Alonso thlakin Real manager hna a chelh tan a, Nilaini zana a hna hmasaberah a team a tlawmpui nghal ngawt avangin Inrinni zan league match khelh tan dawnah fans thenkhat atangin dodalna a tawk ve bawk.
Madrid boss thar chuan, “Bernabeu hi ka zah thin a, he khelmual chhunga mipuite pawh ka zah. Vawi duai lo boo khum ka lo tawk ve tawh thin. Tunkar hi kan tan chawlhkar duhawm a ni lo a, fans lamin an thinrimna an lantir pawh kha ka hriatthiampui thlap. An demand siamte khan player-te pawh anmahnia a tha ber a sawrchhuahtir ngei ka beisei a, Vini erawh kha chu an boo zui zel loh ka beisei,” a ti.
Bernabeu inkhel luhchilh ila.
First half chhungin mualneitu team lamin goal khung zo lo mah se second half tir lam minute 58-na lekah Kylian Mbappe chuan a hlawhchhuah penalty atangin Real goal hmasa zawk a chhuihlut a, minute 65-ah Raul Asencio chuan 15-time European Cup winners tan goal khat dang thawh ve lehin, head coach thar hnuaia an league game hmasaberah point thum an thawkchhuak a, Barca kal fal zel tur mawngphe an hmu pha leh phawt.
Copa del Rey-a second division club Albacete tihte mai mai laka an mualpho hnuah Arbeloa chuan Mbappe leh Bellingham-te chawlhtir ngam tawh loin starting XI-ah a hung chhuak a; tan atanga minute 10 lai kha Estadio Bernabeu chhunga mipui 70,104 zet pungkhawm zinga a tam zawk khan Bellingham an bitum a, a ball chan laiin an boo khum dur dur a, tawngkam chhe tinrengin an au bawk!
First half chhungin inkhel thunun tho bawk mah se Real hmatawngte khan target fuhin vawi khat chiah mikhual goal lamah ball an thawnlut zo a; chawlhlawk lain Arbeloa chuan teram a siksawi hlek a, second half-ah Arda Goler leh Franco Mastantuono a luhtir.
Adrian de la Fuente laka a penalty hlawhchhuah hmangin Mbappe goal hmuh tur a awm zui ta thuai a; season kal laia goal 19 thuna La Liga top scorer ni mek France forward leh kum 21-a upa forward ve tho Gonzalo Garcia-te kha Real fans-in Inrinni zan inkhelh laia an ngei loh mi tlemte zingah an tel!
Guler-a corner chhuih buaipuitute zinga zuang sang ber defender Asencio goal a luh leh hnuah mualneitu team dinhmun a him fela ngaih a ni a, si hnih faiin an chak zui ta reng a ni.
Real hian naktuk zan Champions League match pakhat khelin Bernabeu khelmual bawk an lut zui leh dawn a, Monaco an mikhual ang.
League khelh 20-a point 48 hum chungin Real Marid-in La Liga table-ah pahnihna an luah chhunzawm zel a; nizan result tarlan hman lohah hmahruaitu Barcelona-in Real Sociedad mual atanga point thum an hawn theih chuan an hmahruaina a fal leh hsawt dawn a ni.