Cocoon metric ton hnih thawnchhuak
Silk Samagra-II hnuaia Eri Cut Cocoon (pangang inzial) metric ton hnih, state pawna thawn chhuah a ni dawn a, Sericulture minister Lalthansanga chuan Zirtawpni khan a vailiam.
Minister chuan state pawna thawnchhuah tur Eri Cocoon thahnem tak kan rama thar a ni chu lawmawm a tih thu a sawi a. Kan pi leh pute hunlai atanga kan lo neih thin dan (Jhum cultivation) atanga lo neih dan nghet (permanent farming system) kan kalpui zel a ngai tih a sawi a. Eizawnna awlsam leh hralhna awlsam silk pangang khawi lamah mipuiin tan la thar turin a chah.
Sericulture director V Zothansanga chuan Cocoon khawitute an ngaihtuah em em a, an pangngang khawi chu man man zawka an hralh theihnan theihtawpin hma an la a, department-in hlawk zawka Cocoon hralh a nih theihnan hma an la mek tih a sawi a ni.
Tun tuma Eri Cut Cocoon thawnchhuah tur hi a hrin laiin metric ton 11 a ni a. A chhunga buhchi-um (pupa) tel loa hralh tur a nih avangin buhchi-um lak chhuah vek a nih hnu-ah metric ton 2 vel niin, Jahur Uddin (Barpeta Marketing), Barbeta district Assam chuan a lei. A leitu hi silk entrepreneur niin, kum 10 chuang hmarchhaka Cocoon thar leikhawmin Assam leh West Bengal-a silk spinner hrang hrangte a supply chhawng leh thin a ni.
Kg khat hi Rs. 700 zela hralh niin, an lak chhuah tak a buhchi-um metric ton 9 pawh Mizoram chhungah Rs. 300-400 a hralh vek a ni bawk. Kumin June khan sericulture farmer-te tharchhuah kg. 1000 vel chu department-in a lo thawn chhuah sak tawh a ni.
Eri Cut Cocoon tharchhuah hi department leh ‘Silk Cocoon Processing and Marketing Industry Private Limited’ tangdunin state pawna lei duhtute hnena hralhna kawngah an thawkdun a ni.
Cocoon metric ton hnih thawnchhuak
