College zirlaite phut – Professor lak ngheh leh Burma raltlan khuahkhirh
Aizawl City College Joint Students’ Union (ACJSU) chuan RUSA 2 hnuaia college professor lak zinga la thawk mi 59 chu kumin chhungin sawrkarin a ngheta la ngei turin an phut a. Burma atanga raltlante awmze neia khuahkhirh an duh tih an sawi bawk.
ACJSU hruaitute sawi danin, Mizorama college hrang hrangah professor post 189 vel a ruak mek a, a bikin Aizawl pawn college-ah zirtirtu indaih lohna a nasat avangin zirlaiten an tuar hle. College zirtirtu chanve deuhthaw hi college sum leh contract-a lak an ni a, heng ho hi thalai zawk, fit tak tak, an thiamna in a tlin phawt chuan a ngheta lak atana tha an ni tih an sawi.
RUSA 2 hnuaiah kum 2019 khan University Grants Commission-in a phut ang thlapin MPSC chuan college zirtirtu 74 a la a, ruahman lawk ang chuan kum hnih hnua state sawrkarin a lak ngheh tur leh an hlawh pawh a tum zui tur a nih laiin, hemi ang hian kal a ni ta loa, an ngheh leh ngheh loh pawh an inhrechiang loa, tunah chuan 59 chiah an thawk tawh tih ACJSU hian an sawi a. “A ngheta an luh theih lohna tur hian secretariat lamah lo do tlat tu an awm tih pawh kan hria,” an ti.
Tunhnaia chief minister an hmuhnaah hemi chungchang hi an thlen a, a ngheta an lak ngei tur thu in a lo chhang tih an sawi. Kumin chhung ngeia a ngheta dah turin sawrkar an phut tih an sawi a ni.
Burma buaina avanga Mizorama raltlan lo lut chu mi 35000 chuang an ni tawh a, mi 13000 chuang relief camp-ah awmin, mi 18000 vel chu khaw hrang hrangah in luahin an awm tih ACJSU hruaitute hian an sawi a. Manipur buaina avangin sahimna zawnga rawn lut mi 9000 vel an awm mek tih an sawi bawk.
India sawrkarin raltlan/ internally displaced people ho hi 2023 September 30 ralhmaa biometric data lak vek tura thupek a chhuah tawh laiin, tun thlengin tih a la ni loa, raltlan kan pun hnu ah crime rate a san phahin tual thihna hial a thleng a, unau ni mah ila, Mizorama Mizote himna chu a pawimawh hmasa bera an ngaih avangin, chhinchhiaha khuahkhirh an duh tih an sawi a ni.
ACJSU thil sawi dang:
8 Mizoramah hnam bil pawl din belh tawh lo turin an ngen a. A bikin hnam bil zirlai pawl thar ding tawh loin, Mizo Zirlai Pawl ah inlungrual turin an chah. Zirlai pawh ni tawh lo, engemaw hamthatna duhna avanga pawl hruaitu nih tum an awm tih an sawi.
8 Hnam bil pawl chu an din chhan hrechiang a, anmahni kaihhnawih loa inrawlh tam lo turin an sawm tih an sawi.
8 The Forest Conservation & Amendment Bill 2023 chu Zofate tan a him lo, inchimral tumnaa an ngaih avangin state assembly-in amend ngei turin an phut tih an sawi.