College zirtirtu sawn vangin nuar Zirtirtu dah belh phutin nuar dawn

College zirtirtu sawn vangin nuar
Zirtirtu dah belh phutin nuar dawn
Govt. Zirtiri Residential Science College zirlaite chuan zirtirtu transfer chungchangah Thawhlehni khan nawrh (silent protest) an huaihawt. Hetihlai hian Govt Serchhip College zirlaiten zirtirtu dah belh ngiatin lungawiloh lantir an tum ve mek bawk.
Thudawn danin Govt Zirtiri RSC zirtirtu (botany) Lalthanpuii Hnamte chu sawn a ni a, zirtirtu dang dah a ni dawn. Hei hi zirlaite zirna nghawng thei thil a ni, tiin, exam dawn hnaih, hun tepter lutuka thil tih a nih avang leh hun hmasaah pawh hetiang thil hi an college-a a lo thlen fo tawh avangin a lungawithlak loh tih an sawi a ni.
Lungawiloh an lantir hian awmzia a nei lo a nih chuan ngawrh zawkin hma an la dawn tih an sawi.
Govt Serchhip College Student Union chuan an college-a lecturer mamawhte vawi engemawzat sawrkara an lo thlen tawh chu vawiin thlenga tih hlawhtlin a la nih loh avangin vawiin – April 16 zing dar 8.30 atang hian tiamchin awm loin college chhunga vantlang kawng dan an tum tih an sawi.
He kawng hi Serchhip bawrhsap, SP leh sawrkar mi pawimawh dang residential complex panna kawng leh an kalkawng ber tih sawi a ni.
SU hruaitute sawi danin, kumin February-a an bialtu MLA, chief minister chuan Geography department-ah zirtirtu nghet pahnih, Zoology department-ah a nghet pakhat leh nghet lo pakhat, BCA department-ah a nghet lo pakhat dah a tiam chu tun thlengin tihhlawhtlin a la ni lo.
Tunhnaia Govt. Serchhip College atanga Govt. Zirtiri RSC-a sawnchhuah Dr Lalhmangaihzuali Ralte, (Botany) chuan release order a lak tawh avangin a aiawh tura sawrkarin a pek Lalthanpuii Hnamte chuan Serchhip College zawm thuai se an duh tih an sawi bawk.