Compensation atan ram inpe loang
– Lalchhandama Ralte
Tuivawl biala National Highway 02 leh 306A hmasawnna lokal turah compensation tam lutuk avanga bial hmasawnna tur a thuanawp lohna atan VC-ten ram inpe lo turin Tuivawl bialtu MLA Lalchhandama Ralte chuan a ngen.
Darlawn Rural Development Block chuan a kum 50-na Golden Jubilee chu Ningani khan an lawm a. Hmanpuitu leader of opposition ni bawk Lalchhandama Ralte chuan kum 50 hmel hmu tawh RD Block-in fahrin neih a hun tawh hle tih sawiin, “Block chhunga khaw hla ber chu Aizawl atangin km.200 vel a ni. Block then tam hi hmasawnna bul a ni a. Central atanga scheme lokalte hi a zarzotu an tam poh leh hnathawhna tur a lokal tam dawn a ni,” a ti.
Tuivawl bialah landlock an nei a, he tlangdung hi hmar thimpui tih a ni hial thin tih a sawi a. Hetihlaia National Highway 02 leh 306A hmasawnna lokal turah kawtchhuahpui an ni dawn tih sawiin, “Compensation awm theiah VC-ten ram lo inpe suh u. Compensation tam lutuk avanga kan bial hmasawnna tur hna a thuanawp a hlauhawm hle a ni,” a ti.
RD Block atanga hmasawnna kal chhuak PMKSY hna chu party worker-te kuta awm tawh loin, a thlenna tur takah thleng tawh se a duh tih MLA hian a sawi a. Watershed Committee kutah awm se, tiin sawrkar a ngen tih a sawi a ni.
Compensation atan ram inpe loang – Lalchhandama Ralte
