National Highway 302 kawng laih zauh mekah ram neitu thenkhatin zangnadawmna an la lak loh lak phutin May 6 atang khan Lungsen huamchhungah hnathawktute chu tiamchin awm loin an chawlhtir a. District administration chuan sawrkar hmalakna kal mek inhrilhfiah tawh hnua hetianga hma la tute chu dan anga an chunga hma lak a nih tur thu an hriattir ve thung.
Land Owners Coordination Committee on NH-302 Lungsen & Rangte VC Area sawi danin, NHIDCL-in kawng a laih zauhah hian Lungsen huamchhung a paltlang dawn avangin kum 2020 khan compensation first phase sem a ni a, kum 2021 ah sem zoin, 2022 ah a bak mi 35 hnena sem tura ruahman chu an la nghak chhuak lo.
Inbiakremna angin an ram pawh laih sak an awm a. Inbiakremna anga zangnadawmna pek thuai an ni lo chu hriatthiam harsa an ti a, NHIDCL nawr nan thawktute chu chhunzawm tawh lo turin an duh tih an sawi a ni.
Compensation chungchangah hian kumin April 15 hmaa chanchin lawmawm an hriat loh chuan a tul anga hma lak an tum tawh chu CALA leh NHIDCL lamin ngaichang tura an tih angin an ngaichang a, tun thlenga thu lawmawm an la hriat loh avangin tiamchin awm loa hnathawkte chawlhtir phawt hi an rel ta tih an sawi bawk.
Lunglei district magistrate chuan kawng laih zauh hna thawh tihkhaihlak a ni hi a ngai thutak hle tia thuchhuah siamin, ‘CALA-in NH-302 kawngpui zauh hna kal mekin ram a tihchhiat tawh emaw a tihchhiat tur ram neitu, tun thlenga zangnadawmna la dawnglo ten a rang thei ang bera zangnadawmna an dawn tur an dawn theihna’na hma a lak dan a hrilhfiah tawh a. Hmalakna a kal mek lai leh hmalak dan pawh inhrilhhriat a nih hnu lawka sawrkar hmalakna tikhaihlak zawnga chet lak tumna a awm hi a pawi hle,’ a ti.
NH-302 kawng zauh leh siamthat hna kal mek chu he kawngin a paltlang khua ho chauh nilo, Lunglei district mipui nghahhelh, furpui thlen hmaa hnathawhna hun tlemte a la awm chhungin a tam thei ang ber thawk turin NHIDCL leh contractor-te pawh nawr mek an ni tih district magistrate hian sawiin, NHIDCL-in estimate thehluh zawng zawng chu a rang thei ang bera enfiah a, dikhlel laite CALA nen sawiho zung zung a, assessment leh estimate chu an hotu sang lama thehluh thuai an intiam tawh tih a sawi a ni.
‘Kawngpui zauh hna hi chawl loa a kal theihna’n Lungsen leh Rangte VC huamchhungah compensation la dawnglo te ram tih loah chuan he kawngpui siamthat hna hi chhumlo chat loin a kal tur a ni a, hna kal mek tikhaihlak leh tibuai zawnga khawsa an awm a nih chuan an chungah dan angin hma lak a ni ang,’ thuchhuak chuan a ti.
Compensation phuta kawng dangtute Hna ti khaihlak lo turin hriattir an ni
