Mizoram Hindi Training College (MHTC) a compulsory-a Yoga subject zirtir tura tih chu Mizo Hindi Zirlai Pawl chuan a dodal a. Lungawilohna an lantir hnu ah inremna siam a ni.
Mizo Hindi Zirlai Pawl (MHZP) sawi danin, Mizoram Hindi Training College (MHTC) ah kum 2023-2024 atang hian Hindi Shikshan Praveen (D.El.Ed) leh Hindi Shikshan Parangat (B.Ed) zirlaiah kumtir syllabus-a tel lo Yoga subject chu chawpchilh takin compulsory subject atan February 2024 atang khan zirna kalpui a ni a. Hei hi tha an tih loh avangin February 12 khan MHTC principal hnenah second term exam hmachhawn tur an nih tawh avangin Yoga subject hi cancel a nih theih nan hma la thuai turin an ngen a ni.
An ngenna in awmzia a neih loh avangin MHZP hian Nilaini khan MHTC staff-te office kai tur an dang a. An thil phut a hlawhtlin hma chu lungawilohna lantir a, exam boycott thlenga hma lak an tum laiin an inrem a, lungawilohna lantir hi an titawp a ni.
Inremnaah chuan, February 19-29 chhunga second term internal exam neih turah Hindi Shikshan Parangat leh Hindi Shikshan Praveen 2nd year-ten Yog Vigyan exam loin assignment an submit atanga mark pek a ni ang. April-May a final exam an neih turah ‘Yog Vigyan’ a tel lo theih nan ziakin Kendriya Hindi Sansthan Agra-ah thlenin, theihtawpa hma lak a ni ang.
‘Yoga hi kan sakhuana nen pawh a inhal avangin hetia barhluih kan nih avanga lungawilohna hi Kendriya Hindi Shansthan Agra hnenah ziakin thlen nghal a ni a. MHTC nena kan inremna hi kan enzui zel dawn a ni,’ MHZP hian a ti.
Compulsory-a Yoga zirtir tumna MHZP-in a dodal
