Congress a sawrkar chuan kuhva
ro kaltlang thin titawp nghal ang
– Lalrindika Ralte
Congress party a sawrkar chuan Mizorama kuhva rah ro kaltlang thin chu an titawp nghal dawn tih Congress MLA Lalrindika Ralte chuan a sawi.
Hachhek bialtu MLA hian a bial chhung khua a fannaah, Hachhek bial buaina ber chu an ram chhunga kuhva thar hralh lehna a ni, tiin, foreign kuhva (smuggling) kal reng avang hian kuthnathawktuten an tuar a. A hlawkna an beisei ang zat pawh an hmu pha lo nasa hle tih a sawi. “Congress party hi sawrkar tha siam theia min hungchhuak a nih chuan, Mizoram chhunga kuhva rah ro rawn kaltlang thin hi kan titawp nghal anga, khawtual mite duty ngai tawh loin mahni hna theuh tang takin kan thawk tawh zawk dawn a ni,” a ti.
Sawrkar tha siam a pawimawh a, chumi tur chuan leader tha neih a ngai tih MLA hian a sawi a. Ram kaihruaitu lu ber fuh lo sawrkar chu mipuiin kan tuar a, politics ngaihtuah lo te thlengin kan tuar vek zel tih a sawi. “Congress party-in mi dik leh rinawm, hruaitu tha Pu Lalsawta hoa sawrkar tha siam kan tumnaah hian mipuiin min rawn zawm zel turin ka sawm a ni,” a ti.
MLA/ minister nih chu an mimal hamthatna tur a ni loa, chutiang tura MLA atana inpe a ni bawk hek lo tih sawiin, “Democracy ramah a bikin Mizorama constituency 40 zingah Hachhek bial tan tarchhuah ka ni mai a. In aiawha ding tur leh he ramin hma a sawn zelna atana theihtawp chhuaha thawk tura inpe ka ni. Engmah hi ka ta bik tur a ni loa, ka ta pawh a ni lo. Kan zavaia tan, kan bial mipui tan, ram leh hnam tan a ni tih kan hriat nawn fo a ngai a ni,” Lalrindika Ralte hian a ti.
Congress a sawrkar chuan kuhva ro kaltlang thin titawp nghal ang – Lalrindika Ralte
