Congress senior leader Sam Pitroda thusawi danah BJP Mizoram chuan Ningani khan an office kawtah duhlohna an lantir.
BJP Mizoram president Vanlalhmuaka chuan, Congress senior leader Sam Pitroda hian May 8 khan India ram chhak lam mite chu Chinese mi an anga, India chhimlam mite chuan African mi an ang,’ tiin, hmusit takin a thusawinaah comment a pe tih sawiin, “Hetianga India khua leh tui, party khat hruaitu ngeiin, a Indian puite comment pe duh khawpa rilru tha lo, tawngkam a cheh avang hian, a bikin India hmarchhak mite phei chu kan rilru a na a, miten ‘Chingki’ tia min hmuhsitna chu a tizual hle dawn a, a rang thei ang berin a tawngkam hmanah hian India mipui hriatah ngaihdam dil turin kan phut a ni,” a ti.
India ram chu vun rawng hrang hrang leh hnam hrang hrang chenna hmun a nih angin, kan vun rawng leh kan lan danah tumah inhmuhsit a thiang lo tih hre nawn a, chi leh chi hnam leh hnam hmanga ram min thendarh an tum chu sim turin an duh tih a sawi bawk.
‘Congress party chuan an ze dik tak an chhuah leh taah kan ngai. Hetianga vun rawng leh pianhmang lan dan avanga tawngkam dengkhawng tak hman hi Congress party leh an hruaitute hian an sim thuai a ngai a ni,’ BJP Mizoram thuchhuak chuan a ti.
Sam Pitroda thusawi duhloh lantirnaah hian BJP Mizoram MP Election in-charge Devesh Kumar leh MADC CEM M Laikaw te bakah party mite an tel a ni.
Congress hruaitu thusawi dan duhlohna BJP Mizoramin lantir
