Rajasthan-a State Assembly Election lo awm tur atan Congress Party chuan candidate tur a puan vawi rukna atan mi 22 hming a ti chhuak leh.
Congress chuan Public Health Engineering Department changtu Minister ni mek Mahesh Joshi chu a bial ngai Jaipur-a Hawa Mahal constituency atanga din tir an phal lo a, a aiah Jaipur city unit president R R Tiwari chu an dah a. Heti hian Congress chuan Rajasthan-a Assembly Constituency seat 200 awmah seat 178 atan candidate an puang tawh a, heng zinga seat khat chu Bharatpur niin Rashtriya Lok Dal (RLD) tan an dah.
Mahesh Joshi-PHED Minister, Shanti Dhariwal-Parliamentary Affairs Minister leh Dharmendra Rathore-Chairman, Rajasthan Tourism Development Corporation (RTDC) te chu nikum September thla-a Congress MLA te inhmuhkhawmna Chief Minister Ashok Gehlot chenna ina an buatsaihnaah party thu zawm lo ni a an hriat avangin sawm an ni ve lo a, hemi lai vek hian Dhariwal-a chenna inah lo inhmukhawm vein Sachin Pilot-a Chief Minister atana rawtna awm reng reng dodal zel an tum tlat a ni. Hetih hun lai hian Gehlot chu Congress Party President tura beisei te zingah a tel lai a ni.
Rajasthan Assembly member-200 awmna hi November ni 25-ah an inthlang ve dawn a, December ni 3-ah State dang te rualin vote chhiar a ni ang.
Congress-in Candidate tur 22 hming puang
