Lengpui leh Sihphir-a Indian Air Force hnena ram lei tir danah thil dik lo awm nia sawiah Congress party-in dan dik taka CBI chhuitir tura ngenna an thehluh avangin ZPM party-in CBI chhui tir tuma an lo inpuahchahna chu hnukkirin a sawrkar anga consent pek chu an duhtawk mai dawn tih minister B Lalchhanzova chuan a sawi.ZPM Media Committee chairman B Lalchhanzova sawi danin, he ram inlei sak danah hian chhuichian ngai chhui tir turin MNF leh Congress party-a an hruaitute hming lamin an lo ngen tawh a. Hma an lak lawk loh avangin February 4-a Council of Ministers thutkhawm zawha an sawihonaah, Revenue minister hminga CBI-a FIR thehluh mai an rel ta a, dan hremite an rawn zau hnu ah an thurawn angin, minister hming ni loin, ZPM Media chairman a nihna zawkin thehluh an tum a, chutiang tur chuan FIR leh a kaihhnawih document pawimawh, phek 95-a chhah chu CBI director hnena thehluh turin an buatsaih zui ta tih a sawi a ni.
Hei hi hria in hnawhsarum takin MNF chuan February 5-ah chief vigilance officer hnenah complaint an thehlut a, an thu thehluhah hian document pawimawh leh presentation dang engmah a tel loa, CVO hian chhui dawn pawh ni se, amaha document a lakkhawm chawp a ngai dawn tihna a ni a, a kawng a thui dawnin a kawng hmang lo hle tih a sawi.
MNF thu thehluh hria hian Congress party pawhin Aizawla CBI Unit hnenah complaint an thehlut ve leh a, hei erawh a kalhmang tur dik tak a nih avangin an thaw huai ta tih ZPM Media chairman hian a sawi.
“ZPM PAC chuan Media Committee lam inhuamna leh hmalak tum dan chu, an thangkamin party pahnih a awk ta bawk a, a tha alawm, tiin ZPM party hminga CBI-a thehluh ve kher chu tul loah a ngai a, CBI-in he case hi dan ang taka a chhui theihna atan consent pe ila, CBI tha i ti chak zawk ang u, a ti ta a ni,” a ti.
IAF hnena ram hawhtir thua compensation-ah hian dan dikloa mantang ei an awm a nih chuan tumah hlahthlem neiloa hrem ngei chu ZPM duh dan a ni tih a sawi bawk.
Congress-in dan dik taka CBI an pun avangin consent pek kan duh tawk ang: – B Lalchhanzova
