Congress-in India rama e-roll
tihchingpen duh lohna lantir
Aizawl District Congress Committee huaihawtin August 14 zan khan India rama electoral roll tihchingpen duhloh lantirna – ‘massive candle lights protest’ Vanapa Hall kawtah neih a ni.
Thusawitu MPCC senior vice president Lalnunmawia Chuango chuan India ram hmun hrang hranga electoral roll tihchingpen a ni chu BJP leh a thawhpuiten chakna an chan theihna tura hma an lakna a ni satliah loa, India ramin domocracy a neih tihbawrhbanna a ni tih a sawi.
“Hetianga a kal zel a, election dik leh felfai taka a kal theihna tura a enkawltu a ruat, sawrkar hnuaia awm lo, constitutional body election-in a tih tur a ti thei lo a nih chuan democracy kal zel dan tur hi ngaihtuahawm tak a ni,” a ti.
India ramin constitution felfai leh tha tak a nei a, hemi neih theihnana sulsutu chu Congress party a ni tih MPCC hruaitu hian a sawi a. “Inthlan felfai tak kan neih theihna tura dan chipchiar leh tha tak, vote thlak dan tur leh vote nei thei turte fel taka lo siamtu pawh Congress party kan ni a. Heng hi tihbawrhbanin a awm mek,” a ti.
2024 Lok Sabha inthlanah thil fel lo tamtak a awm tih Congress party chuan hre mah se, finfiahna a awm mai loh avangin engemaw chen an zirchiang a. Tunhnai lawkah Congress hruaitu Rahul Gandhi chuan a rawn puang ta a. Banglore-a Assembly bial khat chauhah pawh vote nuai khat chuang tihchingpen a ni a; Bihar-ah inthlan a awm dawn a, chumia draft roll an tihchhuahah voter nuai 65 chuang roll atangin a chhan mumal sawi awm loin an paih tih a sawi bawk.
Tunah hian BJP leh Election Commission of India chu an buai chho mek niin a sawi a ni.
Congress-in India rama e-roll tihchingpen duh lohna lantir
