Tunhnaia zurui pakhat silai cheleka a chet laia kutlawnga chhuhsaktu, Delhi Police ami Mizo nula, PC Vanlalruati chu Congress party-in chawimawina a hlan.
Congress Thalai leh Mizoram Pradesh Mahila Congress Committee chuan Zirtawpni khan Congress Bhavan-ah International Women’s Day pualin an hmang a, Mizo hmeichhe huaisen leh chhuanawm, Delhi khawlaia zurui silai nena inhrosa, kutlawnga a silai chhuhsaktu, PC Vanlalruati hi chawimawiin, a aiawhin a chhungte hnenah chawimawina thuziak leh sumfai hlan a ni. A chanchin tawi sawi a ni bawk.
Congress Thalai senior vice president Ngurdingpuia Pachuau chuan he ni pual hian hmeichhiate an dikna leh zahawmna, beiseina leh thianghlimna kan vawnhim sak a tul, tia sawiin, “Mizo hmeichhe tamtak chawimawi tur an awm rualin, India ram pum anga Mizote min tihmingthatu PC Vanlalruati hian chawimawi a phu a ni,” a ti.
Mahila Hqrs. president Vanlalawmpuii Chawngthu pawhin tunlai khawvelah hmeichhiaten an theihna kawng hrang hrangin an lanchhuah tir ve thei tawh, tiin, “Tharumah mipa tluk lo mah ila, eizawnna kawng hrang hrang leh politics thlengin kan tan kawng a inhawng vek tawh a, chu’ngah chuan hmeichhia kan nih avanga indahhniam mai loin, kan theihna lan chhuahtir tura tan lak a tul a ni,” a ti.
Congress-in Mizo hmeichhia chawimawi
