Congress hruaitu inthlan turah president-a a tling chuan an party inpumkhatna a ngaipawimawh hmasa dawn tih MPCC senior vice president Lal Thanzara chuan a sawi.
Thawhlehnia Congress Bhavan-a inkhawmah Lal Thanzara chuan MPCC president nih a beisei ngai loa, nih tumna rilru pawh a pu ngai lo tih a sawi. “Kan party senior hruaituten tun dinhmunah Congress party inpumkhatna tur ngaihtuah a ngai a. Thawhhona tha kan neih theih nan president ni turin tlawmngaih chhuah rawh, min ti a, vawiin hi kan thleng ta a ni,” a ti.
MPCC official candidate ho thlantlin an nih chuan, inthlan an hmachhawn turah pawh hnehna an chan theih nan party chhungah thawhhona tha nei turin theihtawp an chhuah dawn tih MPCC senior vice president hian a sawi a. A tling lo lam phuba lakna ang maia inrahbeh tha an ti lo tih a sawi. “President atan ka tling a nih chuan, mimal tak pawhin inlungrualna tur ka ngaipawimawh dawn a. MLA 34 lai neia lo sawrkar tawh kha, Congress duhsak tawh thintu zawng zawng Congress-a haw runpui kan siam dawn a ni,” a ti
MPCC vice president Lalnunmawia Chuaungo chuan an party chu Pathian leh mipui zarah ram tana hna thawk thin a ni a, chutiang hna tha, hmasawnna thlentu a nih leh theihna chauh chu a tum a ni tih sawiin, chutiang tur chuan theihtawpin hma an la zel dawn tih a sawi. “Ram tana hna thawk tur leh rorelna tha ram mipui pe tura kan tanrual a ngai. Party mi mai ni lo, Mizoram mipui, party awn bik neiloten rorelna tha beiseia an tuihalna chhawk zangkhai turin Congress party-a theihna awm chu mipui hmuhtir hi kan tum a ni,” a ti.
Congress inpumkhatna a pawimawh – Lal Thanzara
