Central-a BJP-in beisei a pha lo chho zel a, Rahul Gandhi chu an beih ber a ni ta mek a. Mizoramah pawh Congress an tho kang leh mek, tiin Congress treasurer Dr Lalmalsawma Nghaka chuan a sawi.
Zirtawpnia Congress Bhavan-a inkhawmah MPCC treasurer chuan, central-ah BJP an sawrkar ang, ti ngam an awm ta meuh loa, tunkar chhung hian stock market a sukual nasa a, expert-ten a chhan hrang hrang an sawi zingah ‘hung parliament’ an beisei thu pawh sawi tel a ni tih a sawi.
Modi a mangang em em a, seat 400 chuang an lak tur thu sawia tlangau thin kha, tunah chuan Rahul Gandhi a bei ngar ngar ringawt a; Amit Shah pawhin nasa takin Muslim mite a bei ngat ngat ta zawk tih a sawi. Hmana Rahul Gandhi nuihzat a, deusawhtute khan an fak leh tawh a, hman hnuaihnung leh kuthnathawktuten an tana ding Rahul Gandhi an ngaina em em leh ta tih a sawi bawk.
Mizoram Congress pawh an tho kang mek nia sawiin, “Keini chuan nghet taka din kan mamawh. Kalphung thar kan mamawh ve tawh loa, kalphung dika kan kal a ngai. Kalphung tharah chuan mite fak beiseiin hna an thawk a, danglam bik angin an inzuar kual a, midang fak nan chauh hna an thawk thin. Keini chuan mipui tih lawm tum ringawt kalphung kan duh ve loa, mipuiin lei rem an rah theih nan mi ngelnghet leh rintlak kan nih phawt a ngai,” Dr Lalmalsawma hian a ti.
Tun dinhmunah eng kawng nge zawh ila kan hnam a ngelngheh ang, tih ngaihtuahin, kan mamawh dik tak zawng chhuak a, taima taka hna thawh an tum tih a sawi a ni.
“Congress sawrkarin rangva a sem lai khan Zoram mipui chhungkaw tinte kan rethei em em a, a hun lai khan rangva in neih kha kan mamawh ber a ni. Chutiangin NLUP pawh mipuiin an mamawh ber a nih avanga sem kan ni. Tunah hian Zoram mipui mamawh ngun takin kan ngaihtuah a, hun inher danglam mil zela kan insiamrem a ngai. Policy thar, rintlak leh mipui nawlpui ban phak kan mamawh hle a, Congress party chuan ngaihtuahna thar kan seng mek,” MPCC hruaitu hian a ti.
Congress kan tho kang mek – Dr Lalmalsawma
