Political party-te’n by-election neihna tur Dampa bial lam an hawi a, candidate nei ngei tura ngaih Congress party leh BJP te’n an candidate tur an ngaihtuah mek.
ZPM-in Dampa bial by-election-an an candidate tur an puang hmasa ber a, MNF-in tun kar tir lamah an puang ve leh. opposition party dang pahnihte’n thawm la nei lo mah se candidate tur hi an ngaihtuah mek.
Congress party-in an president kaihhruaiin nomination committee an din a, he committee hian an party candidate tur hi an ngaihtuah mek.
An thlen chin hriat a ni rih lo a, an puan hun tur pawh hriat a ni rih lo. Bhavan atanga thudawn pakhatah chuan chawlhkar tharah hian candidate tur puan theih beisei a ni.
Congress party-ah hian mi pahnih hming a ri a, minister hlui pakhat, khawthlang lam bialtu lo ni tawh hming leh an party office bearer pakhat hming te a ri. Mahse anni hi an ding ngei ang em tih erawh hriat a ni chuang lo.
2023 inthlanpuia Congress party candidate kha BJP candidate ni thei dinhmunah a ding mek tih thu dawn a ni.
BJP hian candidate tur an la thlang lo a, a ngaihtuahtu tur committee erawh dinin, anni hian thui tak an thleng tawh. Amaherawhchu, a thlang feltu tur chu Delhi lama an hruaitute an ni.
BJP lam atanga thu dawn danin, inthlan puan hmain candidate tur an puang ngai lo a, tun tumah pawh hian Election Commission of India-in inthlan a puan hun an nghak ang.
An party tih danin, mi pahnih pathum an thlang ang a, chu chu Delhi-ah an thawn ang a, Delhi lamin an lo thlang fel ang tih chu an sawi dan a ni a, Delhi-a thawn tur hming hi chu an nei tawh nia hriat a ni a, chumi zingah chuan 2023 inthlanpuia Congress party candidate a tel tih thu dawn a ni. Ani hian Congress party a lo chhuahsan tawh.
Candidate puang hmasa bertu ZPM chuan campaign an tan tawh a, an party candidate tur pawhin khaw hrang hrang a tlawh kual mek. MNF candidate turin kar tawp lam khan Dampa bial hi a tlawh a, bialtu MLA a nih laia boral Lalrintluanga Sailo nupui nen an thawk chhuak a ni.
Congress leh BJP te’n candidate tur ngaihtuah mek
