Congress party chuan Himachal Pradesh, State tlemte rorelna an chan mekna zinga pakhat chu Bharatiya Janata Party te a chhuhsak atanga kum hnih pawh a la tlinloh laiin hloh mai thei dinhmunah an ding mek.
Thawhlehnia Rajya Sabha inthlanna neihah inbarakhaihna thlengin state Assembly-ah Congress te chuan majority mark 35 chu MLA pakhatin an phak lo mek a ni. Chief Minister Sukhvinder Singh Sukhu chu tunkar chhung ngei hian floor test kalpui lo thei lova siamin a awm hmel a, floor test a nih chuan tuna a landan chuan a sorkar chu paihthlakin a awm bawk ang.
Himachal Pradesh ah hian seat 68 a awm a, majority mark chu 35 a ni. Kum 2022 inthlanah khan Congress te chuan seat 40 la in an chak chiang hle a. Independent MLA pathumin an thlawp zui bawk.
Kum 2017 inthlana seat 44 lai la BJP te chuan inthlan hnuhnung berah khan seat 25 chauh an la thung a. Tun Rajya Sabha election ah pawh chiang taka Congress te chu chak tura rinsa an ni.
BJP MLA te hnawhchhuah nge suspend?
Nimin khan Assembly Speaker chuan BJP MLA 15 te chu harsatna siama aubuaiah leh chetdan mawi lo tiin a hnawtchhuak a.
Heta pawimawh lai ber chu a key technical point chu a ni – BJP MLA te chu hnawhchhuah nge suspend tih mai te chu a pawimawh ber lai a ni a.
Hnawhchhuah annih chuan House strength chu 53 ah a tlahniam dawn a, majority mark pawh 27 ah a tlahniam ang.
Chutiang a nih chuan trust vote lak ni se Congress te chuan MLA 34 lai an la neih avangin harsatna a awm lo tura ngaih a ni a. Mahse, zawhna la awm zui ta fo chu MLA 34 te chu floor test tih ni ah an tel vek ang em tih a la ni leh zel.
Mahse, BJP MLA te chu hnawhchhuah ni lo va suspend chauh an nih chuan House strenth chu 68 a ni dawn a, majority mark chu 35 a ni ang a, floor test neihah Congress sorkar chu a tla mai dawn a ni.
Rajya Sabha poll neihah khan Congress te chuan an chunga thil thleng tur hre hauh lovin inthlan an hmachhawna an party MLA ten cross-voting kalpuiin BJP candidate paruk laiin an vote ta a ni.
Rajya Sabha MP te chu MLA te thlan niin vote 35 hmuh a tawk mai a, Congress te chuan inthlan hma in 40+3 an nei a, harsatna awm tur a ni lo. Mahse, Congress MLA paruk leh independent an thawhpui pathum te chuan Congress senior leader Abhishek Mau Singhvi vote lovin BJP candiate Harsh Mahajan chu an vote ta a ni.
Chuti chung pawh chuan BJP lam chu an chak tihna a ni lo vote a inzatchiaha 34 ve ve niin ‘draw of lots’ hmangin chak zawk zawn a nih hnuah Mahajan chu a vannei zawk ta a ni.
Floor test ngiat
BJP te chuan an la duh tawk mai lo MLA cross-voting a awm chian hnuah Congress MLA an lama vote te chu Haryana-ah an hruai nghal a, Haryana chu saffron party te thuneihna a ni a. BJP te chuan Himachal-ah Congress ten majority an nei zo ta lo an ti zui ta a ni.
Senior BJP leader leh Chief Minister hlui Jairam Thakur chuan hma hruaiin, “Kan chance a tlem em em lai chungin chakna kan chang thei a ni. Harsh Mahajan an chkana a chang a, Congress te chuan thuneihna chang zel turin moral rights an nei tawh lo” tiin a sawi zui a.
BJP te chu an che chak hle a, thawhleh tlaiah Thakur chuan Governor Shiv Pratap Shukla chu hmu nghalin Sukhu sorkar lakah floor test kalpui turin a ngiat zui nghal a ni.
Congress sorkar buai zel
Chutih laiin Himachal Pradesh cabinet minister Vikramaditya Singh chuan banna a thehlut zui ve nghal bawk a.
Singh hi Himachal chief minister tum ruk ni thei Virbhadra Singh fapa a ni a, Shimla Rural seat MLA a ni. Mahse, cross-vote zingah chuan a tel lo va, a ban chhana a sawi chu Congress sorkar mek chuan a pa hminga inthlan laia vote zawng chungin amah zahna an lantir lo a ti.
Congress ten Himachal an chan a nih chuan INDIA opposition bloc anga hmalakna pawh a tibahlah zual tura ngaih a ni a. INDIA bloc hi nikum khan Prime Minister Narendra Modi kaihhruai BJP te hneh an nih theih nana din a ni a. Hun reilote hnuah Lok Sabha inthlan awm mai tur a ni bawk.