Congress te chuan kum 2024 inthlanpui hmaa Opposition tangrual atana an pawimawhzia an hriat thu sawiin hei tak hi tun hnaia Chattisgarh a plenary session neih hunah an sawiho tur thu an sawi bawk a. Party te chuan party thuneitu sang ber Congress Working Committee inthlan neih a nih dawn leh dawn loh an ngaihtuah tur thu an sawi bawk.
Congress general secretary (Organisation) K. C. Venugopal chuan party te chuan Opposition te inlungrualna a awm theih nan hmalakna an neih tawh thu sawiin Bharat Jodo Yatra neihnaah party te an sawm thu an sawi bawk a, hei bakah hian Parliament-a Adani issue sawihonaah pawh party dang te nen inbiakna an neih thu an sawi bawk.
“Kan hna ber chu BJP te number tihtlem a ni,” tiin Venugopal chuan a sawi a. Hei hi tun hnaia Bihar Chief Minister Nitish Kumar an kum 2024 Lok Sabha poll neih turah Congress tena Opposition tangruala an siam thei a nih chuan BJP te chuan Lok Sabha seat 100 pawh an la tling lovang tia a sawi a chhanna a ni.
Congress general secretary (Communications), Jairam Ramesh chuan party chuan Bihar Chief Minister thusawi chu lawmawm an tih thu sawiin chutihrual chuan tute hnen atang mahin an thiltihah ‘certificate’ lak an mamawh lo tiin a sawi bawk.
Plenary neih hunah Opposition unity chu zau zawka sawihona neih a nih tur thu sawiin Congress te chuan State pasarihah pre-poll alliance an siam tawh thu a sawi bawk a. “Kum 2024 hmain Assembly poll nei tur an awm nual a. Congress chak tak a awm lohnaah chuan Opposition unity a awm thei lo,” tiin a sawi bawk.
“Congress te chauh hi BJP te nena khawi hmunah mah la thawkho lo awm chhun an ni a. Opposition party thenkhatte Mallikarjun Kharge an meeting a koha tel mahse ruling party awn si te an awm a. BJP chungchangah hian keini chuan hmai hnih kan nei ve lo,” tiin party hming hmerha sawi si lovin a sawi bawk.
Rajya Sabha MP chuan Congress plenary neih hunah pre-poll alliance neih tur a nih leh nih loh tur te leh thil pawimawh dangte sawihona neih a nih tur thu a sawi.
Bharat Jodo Yatra kha Indian politics a danglamna thlentu a ni tia sawiin chu tak chu Nitish Kumar pawhin a hmuh fuh a ni, a ti a.
Venugopal chuan plenary neih hunah chuan Bharat Jodo Yatra-a thil thleng te bakah Udaipur Chintan Shivir a sawiho te bawhzuina tur a ni tia sawiin theme or tagline-ah pawh ‘Haath se Haath Jodo’ tih hman a nih tur thu a sawi bawk a.
Plenary session hi February 24 atanga 26 thleng ni thum chhung neih tur niin a ni khatnaah steering committee meeting neih ni dawnin chutah chuan Congress Working Committee inthlanna neih tur a nih leh nih loh rel a ni dawn a ni.
CWC-ah hian member 23 an awm a, heng zinga 11 te hi nominated an ni a, 12 te chu thlan an ni thung. CWC hi kum 25 chhung inthlanna awm tawh lo a ni a, senior party leader thenkhatte chuan inthlanna neih ngei an ngiat a ni.
Plenary ni thum chhung awh turah hian delegates 15,000 vel an awm dawn a. All Indian Congress Committee delegates 1,338 vel awmin, 487 chu co-opted an ni a, an vaiin 1,825 an ni dawn a ni. Hei bakah hian Pradesh Congress Committee delegates 9,915 he session chhimtu an awm bawk ang a. Session chu Raipur-ah public rally neia khar a ni ang.
Kumari Selja, Congress general secretary in-charge for Chattisgarh chuan AICC delegates zingah 235 chu hmeichhia niin 501 te chu kum 50 hnuai lam an ni a ti a. Hei bakah hian general category atangin mi 704 bakah minority atangin 228, backward classes atangin 381 leh scheduled castes atangin 192 bakah scheduled tribe atangin 133 an awm ang a ti.
Congress plenary session tur pawimawh dawn
![](https://theaizawlpost.org/wp-content/uploads/2023/02/ccc-1024x576.jpg)