Congress president Lal Thanzara chuan Shiv Sena MLA Sanjay Gaikwad a dem thu a sawi a, Rahul Gandhi-a lei hleptu hnena pawisa pek a tiam avangin Shiv Sena MLA hi a dem a ni.
“Mizoram Pradesh Congress Committee chuan Sanjay Gaikwad, Shiv Sena MLA chu Rahul Gandhi-a ‘lei hlep thei tu’ apiang hnenah cheng nuai 11 pek a tiam avang leh, tawngkam chhe tak, tharum thawhna chokchhuak thei zawnga a sawi avangin na takin kan dem a ni,” a ti.
“Rahul Gandhi hian hmani lawka USA a tlawh khan reservation system chungchang a sawi a, ram hruaitute’n hnam hnuaihnung zawk mi maktaduai tam takte an enkawl dan chu sawiselin, ‘India rama sumdawng hruaitu list en ula, Tribal hming te, Dalit hming te, OBC hming te zawng teh u. Anniho hi India mihring zaa sawmnga zet an ni a, India mi hausa 200 thlan chhuah zingah OBC pakhat chauh i hmu ang.” tiin a sawi a ni,” tiin Congress president thuchhuahah tarlan a ni a, “Sajay Gaiwak hian Rahul Gandhi-a thusawi chungchangah hian rilrem loh zawng a nei a nih pawn, mipui aiawha thlan tlin a nih angin mawihnai takin a duh chuan sawisel theihna a nei a ni,” tia tarlan a ni bawk.
“Hetiang dinhmunah hian Mizoram Pradesh Congress Committee chuan India democracy ropui tak dikna leh hmingchhiatna humhim tura ram dan anga Sanjay Gaikwad-a thusawi buaina cho chhuak zawng leh tawngkam mawi lo tak a hmang hi a lakah khauh taka action la turin thuneitute kan phut tlat a ni,” Congress president chuan a ti.
Congress President-in BJP MLA dem
