- ZPM Thalai
Congress sawrkar laia CM-in
kawng chhia a beidawn san
- ZPM Thalai
Congress sawrkar laia PWD changtu chief minister-in Mizoram kawngpui chhia a beidawn san tih hria in, Congress party chu hei hi hre thar turin an chah tih ZPM Thalai chuan an sawi a. Tuna PWD minister chuan mipui a beidawn san ve dawn lo tih an sawi.
ZPM Thalai Hqrs. thuchhuak chuan, tunhnaiah Mizoram chak lakna kawng ber NH-306 & 06 chungchangah thudik lo thang tam tak a awm tih sawiin, thudik zawk ngaihven zel turin Mizoram mipui a chah tih a sawi.
Ministry of Road Transport & Highway minister Nitin Jairam Gadkari chuan kum 2023 khan Rajya Sabha unstarred question No.748 MP Pu K Vanlalvena hnenah, NH 306 & 06 hi MoRTH chuan four lane-a siam a tum avangin package 8-ah a then a. Package 1&2 hi Assam area niin, package 3,4,5,6,7 & 8 (Vairengte to Sairang) hi NHIDCL Mizoram chan a nih thuin a chhang tih a sawi.
Bilkhawthlir to Kolasib, Kawnpui to Khamrang kawng hi PWD-in a enkawl thin a. Mizoram sawrkar chuan chak zawka kawng siam a nih theihnan kumin May 28 khan chief minister Pu Lalduhoma’n MoRTH minister hi sawipuiin, MoRTH hian NHIDCL hnenah Vairengte to Sairang kawng hi a hmuna enfiah tur leh lirthei lian tlan theiha siam turin a ti a, he hmalakna hi ni 15 chhunga report pe leh turin a hriattir bawk tih a sawi a ni.
MoRTH thu ang hian NHIDCL chuan ni 15 (2025 July 9) chhungin hma an la dawn tih hriain BJP State president Dr K Beichhua chuan July 5 khan NH-06 hi a hmunah tlawhin, an dilna ngaipawimawhin NHIDCL-in July 7 atanga tan nghal turin hnathawhna hmanrua an chhawp, tiin thudik tawk lo mipui a hrilh tih a sawi. NHIDCL-in Kawnpui (km 118) leh Khamrang (km 133) kawng siamna tur bungrua an chhawp hi CM leh PWD minister hmalakna a ni tih a sawi
July 16-ah Congress Thalai-in BRO leh NHIDCL enkawl mek Durtlang to Kawnpui, Kawnpui to Vairengte tlawhin, CM leh PWD minister bang tura an ti ngawt chu thil inrem lo takah an ngai tih ZPM Thalai hian sawiin, ‘NH-306 & 6 chungchangah CM hmalakna aia BJP president fakna thu an chhuah hian Mizoram kawng enkawl danah hriatna an nei tlem hle tih a tarlang a. Congress sawrkar laia kawng an enkawl zawh loh zia leh kawng a chhiat thin zia hre thar leh turin kan chah a ni,’ a ti.