Prime Minister chuan Congress party chu Pakistan ‘thuihruai’ tiin a sawi a, thenawm ram te chuan grand old party a ‘Shehzada’ chu prime minister of India nihtir an chak lutuk a ti bawk.
Hetianga Prime Minister-in a sawina chhan hi Pakistan-a Imran Khan a sorkar lai cabinet member Chaudhry Fawad Hussain-an a social media handle a Congress leader Rahul Gandhi fakna a sawi video a share vang nia ngaih a ni.
“Pakistan a tap mek a, a chhan chu Congress a tlakchhiat mek vang a ni. Pakistani leader te chu Congress tan an tawngtai a ni. Pakistan chuan Shehzada (Rahul Gandhi) chu prime minister nih tir an duh a. Chu chu thil mak a ni lo a chhan chu Congress te hi Pakistan thuihruai an ni tlat a ni. Pakistan leh Congress inzawmna lailanin a awm a, ram hmelmate chuan India in sorkar chak aiah chak lo tak nei se an duh a ni” tiin Modi chuan a sawi.
Central Gujarat a Anand leh Kheda Lok Sabha seat a BJP candidate te a campaign puinaah PM Modi chuan Congress te chu Opposition leader Salman Khirsid niece Maria Alam in ‘vote jihad’ tia a sawi avangin a bei bawk a.
“Tunah chuan INDIA alliance chuan ‘vote jihad’ an kalpui leh ta. A hma zawngin ‘love jihad’ leh ‘land jihad’ kan hre tawh bawk a. Vote jihad sawitu hi educated Muslim family chhuak a ni a, madrasa a zirchhuak a ni lo. Jihad awmzia hi in hriat vek ka ring a. Hei hi democracy hmuhsitna niin Congress leader pakhatmahin demna an sawi lo” a ti bawk.
Congress-te chuan Constitution chu thlak danglam an tum a, Scheduled Caste, Scheduled Tribe leh Other Backward Classes (OBC) communities te reservation chu chhuhsakin Muslim te hnenah pek an tum a ti bawk.
Congress te chu Pakistan \huihruai an ni : PM Modi
