Congress ten Aurangzeb a ‘jizya tax‘ lak leh bawng talh an remti dawn ti

Congress te chuan ‘Aurangzeb a jizya tax’ kalpui an tum a, hei bakah hian ‘bawng talh an thlawp bawk’ tia sawiin kal dan mumal an nei lo tiin Uttar Pradesh Chief Minister leh BJP leader Yogi Adityanath chuan Madhya Pradesh a campaign a neihnaah a sawi.
“Congress kaihhruai INDIA Alliance sorkar a piang a nih chuan minority te duh dan angin duh duh ei remtihna (freedom of food) an pe dawn an ti a. Minority food interest chu majority community te nen a danglam em ni? Chhang, buh leh thil ei pangngai te chu a inang a, majority community te chuan bawngsa an ei duh lo thung a ni” tiin Adityanath chuan a sawi.
“Majority te chuan bawngtalh leh bawngsa ei a duh lo. Congress te chuan bawngtalh an remtih tur thu an sawi hian an hniam tawhzia a pholang a. Ram independence thlentu Congress kha a ni tawh lo. Kal ngaihna hre lo a ni mek” tiin UP CM chuan a sawi bawk.
Congress manifesto erawh chuan bawngsa emaw bawngtalh chungchang engmah sawilan a nei lo thung.
“Congress te chuan khua leh tui dang te ang bawkin minorities te chuan inchei duh dan, eitur, tawng leh personal law ah te an duh thlang thei turin zalenna an nei ang” tiin Congress party mannifesto chuan a tarlang thung.
Adityanath chuan Congress te chuan Mughal ruler Aurangzeb hunlaia ‘Jizya tax’ lak an tum a ti bawk a. “lehlamah Prime Minister Nareandra Modi vision chuan in sakhua te zahin, ram chu khawvel huapa sangah hlangkaiin mirethei te a ngaihsak ang tih a ni a. A lehlamah Congress manifesto in lo hre tawh ang chu” tiin a sawi bawk a.
“Mughal ruler Aurangzeb nunrawng tak chanchin in hre tawh ngei ang. Civilised Muslim family te chuan an fapa te hmingah pawh an sa duh lo. Tax pakhat jizya tax a la a. Vawiinah hian Congress te chuan an manifesto ah jizya tax ngei chu an sawi a ni. Eng nge jizya tax? an sawi fo inheritance tax nen hian a in ang reng” tiin Adityanath chuan a sawi bawk.
April thla khan Modi chuan Congress te chuan ‘inheritance law’ kalpui an tum a, Congress te chuan hausaknate chu Muslim te hnenah sem darh an tum a ni tiin a lo sawi tawh a ni.
Adityanath chuan Congress te chuan Karnataka a an tih dan ang bawkin Other Backward Classes (OBC) leh Scheduled Caste (SC) community te reservation chhuhsak a tum a ti bawk.