CONMEBOL Copa America 2024: Messi hoa final lut Argentina

Ram tana match 186 khel tling tawh Inter Miami forward Lionel Messi chuan a khelh dan leh goal hmanga team fuihphurin nimin zing semi-final match-ah sihnih faiin champion lai Argentina chu Canada lakah a chakpui leh ta a, an title kawl lai humhim thei turin Lionel Scaloni team-in Copa America final an lut a, tunin zing semi-final hnuhnung zawk result tarlan hman loh Uruguay leh Colombia inkhela chak zawk zawk nen Thawhtanni zingah champion nih an inchuh ang.
MetLife Stadium, East Rutherford, New Jersey-a inkhel lianah hian Manchester City striker Julian Alvarez chuan first half minute 22-na lekah Atletico Madrid player Rodrigo de Paul siamsak atangin world champion hmahruaina goal hnai set sawt atangin a thun a, hei bak chawlhlawk hmain goal dang a luhbelh lo.
Second half tan atanga minute ruk an khel tling hlawt tihah kum 37-a upa ni tawh chunga a vanglai hmang tan ang maia la inlan kal mek Argentina captain Messi chuan Chelsea midfielder Enzo Fernandez-a ball chu Canada goalkeeper Maxime Crepeau dan hman lohin a khaklut a, 2-0 hnehna nen South American great hian Copa America hnuhnung vawiriatah a vawirukna atan final an lut a, Copa title la hnem ber ram pahnih zinga pakhat zawk nia he trophy vawi 15 an lak tawh belhchhaha record malkhalh thei turin hun tha an nei chhunzawm zel.
Final match hi Angel di Maria tan Argentina thuam inbel chunga a inkhelh tawpna a ni ve tawh dawn a, a chawlh hlen tak tak hun an huphurh em em Messi hmalam hun pawh chiang taka sawi theih a ni ta bik lo!
TyC Sports hnenah Messi hian a khelhpui mek leh a team-mate hlui kalbo tawh leh chawl ve tawh turte chungchang sawichhuakin, “A tawp lama um pawngpar an tih ang deuhin ka hun hnuhnung lamah nun ka chhek a, Fideo (Di Maria) leh Ota (Nicolas Otamendi)-te hun tawn hre reng chungin engkim hi am takin ka chen mek a, ka khelh apiang hi inbeihna hnuhnung lam a ni ve ta zel mai,” a ti tlat!
Sawizawmin, “National team kan chetchhuahna zawna kan kan hmachhawn leh tawnhriat tawh phawt hi team kan nihna angin lawm takin enjoy zel ang u. Final luh nawn leh hi thil awlai a ni hauh lo a, champion nawn leh tura beih hi a awlsam lo,” tiin an hmachhawp chungchangah a naute a fuih nghal.
Argentina boss Lionel Scaloni chuan international duty la chawlhsan rih lo tura Di Maria leh Messi thlemthluk a tum tur thu sawi ve thungin, “Leo (Messi) pawh hi Angel-a boruak tawn ang hnaih ve tho a ni a, a danglam tam lo. Ani ang tan hian englai mahin kawngkapui kan khar dawn lo a, a duh chen chen kan team-ah hian a khawsa thei dawn a, a ballboot khaia chawlh ve tawh a duh a nih pawhin hun a la duh hretin a rinawm,” a ti.
Inkhelah kirleh ila, world number 48 Canada tan MLS club Nashville tana khel winger Jacob Shaffelburg chuan a tir lamah Canada tana chance tha hmuin a hlawhtlinpui zo lo a; an chance tha ber chu first half hun pekbelha Lille striker Jonathan David-a thelh kha niin, long throw atanga a ball hmuh chu Aston Villa goalkeeper Emiliano Martinez-a zawn takah a thawnlut a, goal a hringchhuak zo lo.
Final em lut zo ta lo mah se Mexico leh USA-te nena 2026 World Cup inthlentawm tur Canada tan Copa America an khelh vawikhatnaa an thlen chin hi a te lo a, Uruguay leh Colombia inkhela chak lo zawk zawk nen third-place play-off an la khel leh dawn a ni.
Canada head coach Jesse Alan Marsch chuan an result-ah lawm lo teh mah se a naute a chhuang takzet tih a sawi a, an zavaia tanghoin performance tha chungchuang an lantir a, Canada atang hian kum reilote lo kal leh turah hian player ei tling tam tak an lo chhuak dawn a ni,” a ti.
Messi lamah bawk a penkawi leh loh theih loh thin a! Second half tir lama a goal tihluh hmang khan Copa America tournament bika goal khung hnem pangana luahtu pahnih Peru star Paolo Guerrero leh Chile player Eduardo Vargas-te nihrualin goal 14 a khawl tling ve ta chiah a ni.
Kha goal vek hmang khan mi tam takin khawvela thiam bera an puan Messi hian Argentina tan goal 109 a thun tling chiah a, international football-a goal khung hnem ber pahnihna ni reng Iran legend Ali Daei hmakhalhin chart-ah a chungber dawttu a luah chho a, chawl tawh leh la khel mek sawi loa international goal khung hnem kawnga a phak loh awmchhun ni ta chu Portugal tana goal 130 thun tling Cristiano Ronaldo chiah a ni ta.