Lallunghnema
Charity Lodge
Cont: 9862288182
Kum 2025 kan zial fel têp! Chibai hnuhnung ber dawttu ka bûk a che u.
Kumin chhung hian Pathian zarah Consumer Huang hi bahlah nei lovin ka la luah thei zel a. Pathian zar a nih bâkah kan Editor leh a thawhpuite leh nangni chhiartute vâng a ni e. Lo chhiar thin lo ula chuan ‘chuti hlauh’ chu ka ni ang a. Lo chhawrtu leh tangkaipuitu awm lo se, ka tâwp daih tawh ngei ang. A khai khawmna atan chuan ziaktu, chhuahtu, chhiartu leh tangkaipuitute inthuikhawm vânga tun hi thleng ka ni e.
‘Mas kan hnaih ta ther ther hle! Mitin kan sâhâwk a ni ber! Kohhranho sak zaa 70 vel chu ‘Mas lam hla a ni tawh. Keini Kohhran phei chuan October thla chawlhni hnuhnung ber atang khan kan U, a mâ tan der tawh. ‘Mas lawm chhûng hi a rei hle. Mahse ‘Mas zawh ni lâ lâ a, Bethlehem lam hawi hla kan han bansan ngawt thin hi chu ka ui thin hle a ni!
Hetih mek lai hian kan tisa leh taksa inbuatsaihna chu a kal mup mup reng a. Thlasik khaw vawh hun lai a ni bawk nen! Bazar lah a lûn a, Bazar nan sum kan tuak a, mamawh lo thleng thleng kan lei thin. Kawr lum, jacket lum, kamis lum, pheikhawk lum, kan ti. Coat pawh a lum lam kan lei thin. Khua a vawh miau avangin puan thuah lum, thawmhnaw lum chu kan mamawh reng a ni. Krismas thawmhnaw thar lei a lo ngai bawk si thin a. Hautak ‘double’ a lo ni a.
Hetih hun lai hian ei in kan intuituah a lo ngai bawk! Chuvangin nasa takin sum a pawimawh a, nei lo pawhin lei kan duh a, mi rethei pawhin kan phak tawk zel a ‘mas’ kan tum a ni. Hausa tâ a ni lova, Mas hi mi tin ta a nih miau avangin kan phak tawk zela ‘U a Mâ’ hmang tur kan ni e.
A khaikhawmna erawh Consumer interest leh Issue a ni vek a. Consumer chuan a dikna leh a chanvo humhalh chu a hna pui ber a ni a, chu chu a hlimna a ni.
Kan thupuia kan tarlan ang hian Consumer-te chu an dikna leh an chanvo venghima humhalh turin an huaisen a ngai a. Consumer-te an huaisen loh chuan an dikna an humhalh thei dawn lo a ni. A tul lovah buaina nasa tak an tawk thin a ni. Chuvangin eng ang pawhin mi thiamten an ‘right’ – te chu hrilh thin mah se, Rules, Regulation leh Act pawh hi hrilh tho thin; mahse, Consumer chuan ama dikna cho chhuak tura huaisenna leh chakna a neih tlat loh chuan vawkpui hmaa tuikeplung dah ang chauh a ni dawn a ni. Chuvangin consumer chu a dawizep tur a ni lova, a tlanchhe mai tur a ni lo.
Consumer khawvel thil buaipuia ka kal kawngah pawh hian mi eng emaw zatin an huaisen tawk loh avangin min tinsanin mun phatsan tawh thin a. Kei teh lul, ka hnena complaint thlen ho tam takte chu an dawihzep avangin an tlan chhe leh fo thin. Dawra thil an leinaahte chuan an huaisen loh avangin Consumer – tam tak chuan harsatna an neih phah a, an duh an sawi tha ngam lo fo a ni. Dawr nghaktuten lol chapo khum châng a nei thin mah se, an tlan chhe tur a ni lo.
Chuvangin mi tin hi Consumer kan nih anga huaisen mamawh kan ni a. Kan huaisen loh avanga kan tuarna a namen lo hle a ni.
Sumdawng leh rinawmna hi kal kawp tura ngaih leh beisei a ni a. Dawrkai leh thil zuarte chu rinawm tura beisei an ni. Mahse he Kristian ramah hian thil zuartu leh thil zuartute chu mipuiin an ‘hmu sakhi’ tlat mai hi a vanduaithlak hle a ni. He ‘inhmuh sakhina’ hi Mizo thinlungah hian a bet hneh hle mai. Thil zuar reng reng uchuak taka thil zuar thinah kan ngai tlat mai a. Thil hralhtute lah an lo rinawm lo tlangpui bawk si a. Thil hi a fel lo nuai tawh a ni.
Sumdawngte hi rinawm se, an thil zawrhte hi thain hmantlak se, MRP aia sangin an bungrua hralh lo se, MRP bel chawpin leh ziak chawp lo se, kan ti a ni. Hetianga consumer bum tumna hi sumdawng rinawm lo mizia tha lo ber a ni. Hetiang mi dawrkai, bum hmang hian Pathian thu pawh sawi tawh suh se, lam pawh lâm lâm suh se. Bungraw chhia, hman tlak lo hralh lo se, kan duh bawk. Hlêpna bawlhhlawh u chuak bansan bawk rawh se. Hlêp tur tâwk hlêp teh se, ei tur tawk eiin in zawk rawh se. Rinawmna chhe tê pawh nei lo sumdawng kut hi hnung khirh tur a ni a, amah pawh inphuar rawh se.
Dawrkai rinawm lo chuan a ei ru a ni.
Dawrkai dikna nei lo chuan mî a rawk a ni.
Sumdawng hawihhawm lo chuan amah a inbum thin.
Kan zir chhuah tur: Mahni dikna leh chanvo veng him tura huaisenna kan neih a ngai. Sundawng leh dawr nghaktuten hawihhawmna kan nei tur a ni.
Chawlhkâr leh, kumin atana tawpna atan kan ti ti ho leh ang!