Chhiartute chibai ka bûk a che u.
Ka article min lo chhiarsaktute hnênah lawmthu ka sawi e. I zarah ka ziah chhuzawm zel chu a nih hi! In lo tangkaipui ngei pawh ka beisei tlat a ni.
Kar hmasa khan Consumer-te harsatna chin fel chungchang leh a kaihhnawih leh keima tawnhriatte ka sawi a. Vairam pur lama District Consumer Court pakhat ‘Judgement’ tawi tê (gist) tarlan a ni bawk .
Tun tumah hian Consumer Outreach Programme tha tak Centre For Consumer Education-in Bawngkawn, Chhim Venga July ni 4 a kan neih thu tlêm thawnthu ang deuhvin ka sawi phawt dawn a ni. Chawlhkar liam ta khan Media Group pakhatah hian vawksa zuar entawn tlak tak thlalak nen a tihchhuah a ni a. Keini Consumer WhatsApp Group-ah pawh hian tarlan a ni a. Tichuan, Centre For Consumer Education chuan he vawksa thianghlim leh fel fai, tha tak dawr chu zawng chhuakin kan va luh chilh ta a. He vawksa dawr hi Z.S Meat Shop a ni a, Bawngkawn Chhim Veng kawngpui âna awm a ni. Kawng chhak lamah hian Z.S Meat Shop lian vak lova tar niin he dawr chhungah hian vawksa rep tui hnai tak an lo siam a, an zuar nghal bawk a ni. Vawksa rêp hi a ‘ve’ chauh a ni a. He dawr chhungah hian sa chi hrang hrang rep sa fun that (packet) hralh chhuah mai tur a awm bawk a. He Meat Shop kan tlawh lai pawh hian a lun hle a ni. He Meat Shop piah lawk kawngpui thlang lamah hian vawksa zawrhna hmunpui chu a awm a. He Meat Shop kan tlawh hnu hian vawksa thianghlim, buk tling leh duh duh thlan theihna hmun chu kan va thleng nghal mai a. Kan va thlen lai hian dawrtu pawh sawm chuang zet an lo nei a. Vawksa bik zawrhna a ni bawk a. Han en mai pawh hian a thianghlim tih a hriat theih mai a. Customer-ten an duh an thlang thei a, bûk tling zâna hralh a ni thinte hi he Meat Shop duhawmna lai ber chu a ni a. Kan va tlawh chhan tak pawh a ni. Heng Vawk sa chi hrang hrang a tî, a nâk, a kaw chhungte hi tlangval inthuam felfai takte hian an lo nghak a. An hmuhnawm hle a ni. Customer Care pawh an nei tha ngiang e. An entawn tlâk tak zet mai. Sa zuartu thenkhat hawihhawmna rêng nei lo, “I duh loh chuan lei lo mai rawh”, tih chîng te leh buk tling ngai rêng rêng lo te ai thlâwt chuan ram an hmangaih zâwk ngei ang a, Pathian thu pawh an awi zâwk ngei bawk ang tih ka ring a ni
He Meat Shop neitute hi an chapo lo hle mai. He Dawra kan va feh chhuah dawn pawh hian an tîm hle a, mipui mit hmuh leh beng hriata inpho chhuah an duh lova, an zak a, zah thlâk an ti a, mualpho thlâk an ti. Mahse, keini chuan, “Midangte en tawntlâka in thawhna hi a ropui a. Tun laiin sa thianghlim tak, ei tlâk, tui si, ngaihthatna khawp kan mamawh. Sa leituten an duh an thlang thei lo fova, an duh lai an lei thei thin lo. Chu bâkah bûk tling lova, sa lei hi an tam êm êm a. Lungawi taka sa lei hi an vâng hle a ni. Nangni chuan a kaw chhung thianghlim tak customer-te duh dan takin in leitir thei a. In entawntlâk a ni. Hma hruaitu in ni,” tiin kan inhrilh a, kan infuih ngial a.
Tichuan, he Meat Shop leh vawksa thianghlim, belh chian dawl tak dawrah hian Consumer Outreach kan nei thei ta a ni a. Kan lawm hle. A neitu Pu Sangzuala leh an mahni dawrtute nen thingpui tui hnai tak kan in hova, thlâ te kan la ho bawk. He thu ziaktu hian thu tlêm a sawi bawk a ni.
He Vawksa Dawra hun kan hman hnu hian kawngpui kama thlai zuarho hnenah mipui hnena HRIATTIRNA LEH NGENNA, CFCE buatsaih chu sem chhuah a ni bawk. Lo chhiar hlawm tak maw le?
He Huanga sa thianghlim entawn tlak ka han ziah hi chhiartute pawhin lo ngaigven teh u, tiin ka han chah che u a ni.
Inverter siam thatsak thu:
Hmanni lawk khan kan thianpa pakhat hian dawr pakhat ami Inverter a lei a. Chu a thil lei chu a that loh avangin harsatna a tawk a, a mangan deuh avangin Consumer Activist-te hnenah a zualko a. Consumer Activist-te chuan an va biak sak a, an lo intifel thei ta tih thu ka hriatin ka lawm hle. Consumer-te tân hnehna a ni chhap e.
Kerala naupang kum 10 mi thiam chantir thu:
Consumer Advocacy Group International hian Consumer Right leh Consumer Cause chi hrang hrangte hi min lo post thin a. Tun hnaiah pawh Kerala State Consumer Commission-in Entertainment group pakhat a hrem thu a tarlang a. Ka thu lakna(source) chu Indian Express.Com a ni. Kerala naupang kum 10 mi lek hi Fantasy Park-a an intihhlimnaah a inhliam a. Ram-tui-lei -lo (disability) -in a awm phah a. Chuvangin he Park hi a pa(father) chuan Consumer Commission-ah a khing a. State Consumer Commission chuan Deficient in Service tia puhin he Park hi thiam loh a chantir ta a. Rs 2.27 lakhs chawi turin thutlûkna a siam ta a ni.
Mizoramah hian intihhlimna hmun park a tam ta hle. Hostel pawh a awm teuh. Hengho hi service provider an ni. Fee chawia hmangtute hi CONSUMER an ni a, dikna leh chanvo an nei. Park neitute leh Hostel neitute hi an fimkhur hle a ngai a ni. Customer-te tel lovin an hlawhtling dawn si lova.
‘Customer is king’ a la ni zel ang!
Consumer Outreach Prog hlawhtling Plus Inverter leitu hlim Kum 10 miin hnehna chang – Lallunghnema Charity Lodge Cont: 9862288182
