Food, Civil Supplies & Consumer Affairs Minister chuan Mizoram sawrkarin chak zawka consumer-te dikna chanvo vawnghim tura hma a lak mek thu sawiin, mipuite chu an thil lei kawngah fimkhur zual turin leh cash memo leh receipt lak taima turin a chah a; sumdawngte pawh dik tak leh hlemhletna tel lova thil hralh turin a chah bawk. He thu hi World Consumer Rights Day nimina Central YMA Hall Tuikhuahtlang-a neih a hmanpuinaah minister hian a sawi a ni.
Minister-te hi chuan thu dik tak tak leh thu tha tak tak hi hetiang nikhuaah hian an sawi thin a, a pawimawh ber ‘a bawhzui’ lam erawh a zuihral leh mai thin.
Minister-in ‘cash memo/receipt lak taimak’ a sawi hi consumer-te tana pawimawh em em ni si, mahse tun thleng consumer tam takin a nachang an la hriat si loh, chumi avanga a hnu lama harsatna tawk zui leh si hi kan la kat nuk a ni ber.
Hetih lai hian, consumer tana buaithlak ve deuh chu, dawr lian pangngai ve si, cash memo han dila dawrkar ten cash memo book an lo neih loh chhuanlama an pekchhuah theih loh thu an dawn chang hian, Consumers’ Union emaw Consumer Redressal Commission lama han thlen/report kha a buaithlak ve hle a; buai hrep ai chuan ‘ni mai mai teh se’ tia tlingtlak tak mai hi a tam ber a nih a rinawm.
Hetiang nikhuaah hian, consumer-ten an rights humhalh tura an bawhzuina tur remchang ‘convenience’ hi thuneitu lam hian vantlang tan an siam a pawimawh hle a. Hei hi Consumer-te dikna leh chanvo humhalhna huanga hmalakna tur pawimawh tak a nih a rinawm. Khawpui chhungah hian a khat mawi tawkin CCTV-in a cover phakah ‘consumers’ complaint box’ hi dah thluah ni ta se, chu chuan awmzia thui tak a neih a rinawm.
Hetih rual hian, sawrkar pawhin consumer-te dikna leh chanvo humhalh leh vawnhimsak a duh takzet a nih chuan, sumdawng/dawrkaite hian thil an hralhna cash memo hi ‘consumer hnenah an pechhuak ngei ngei tur a ni’ tih dan hi khauh zawkin kengkawh ve se, chu chuan awmzia thui tak a neiin a rinawm bawk. Cash memo an duh leh duh loh chu consumer-te kutah innghat mai se.
A pawimawh ber chu, sawrkara thuneitu lamin consumer-te dikna leh chanvo a humhalhsak a, a venhimsak theih nan mipui lam pawhin tihtur kan nei, kan zir ve a ngai; chu chu, ‘Danin ti tura min phut anga tih ve mai’ hi a ni.
Consumer-te dikna leh chanvo
![](https://theaizawlpost.org/wp-content/uploads/tap_logo-min-large.jpg)