Lallunghnema
Charity Lodge
Cont: 9862288182
Chawlhkâr hmasaah khan thil pathum pawimawh tak tak ka ziak a. Consumer-te tana zirtirna nei tha tak tak vek niin ka hria a, a taka(practical) hman nghal tur thil a ni.
Zebra Crossing hi kan hmanna a rei tawh hle a. Mahse kêa kalte (pedestrian) leh motor khalhtu tam zawkin tun thlengin an chhawr tangkai lêm lova; a keng kawhtu Traffic Police-te pawhin an la thutak (sincere) lêm lo bawk niin a lang. Tun hnaiah an han tuai hnûm deuhva, mipui pawhin an ngaihven thar hnu hnawh a ni ber.
Hmanni lawk khan kan naute thihnaah ka kal a. Vuina Programme kan hman zawh hnu lawkah kawngpui kam, Zebra Crossing bul hnaiah Traffic Police pakhat nen kan ding a. Kan ti ti bawrh bawrh a. He ka titipui thianpa hi Aizawl District Consumer Forum-a ka thawh ve laia kan hotupa Pu Hawla vengtu, nau anga ka neih a ni a. He ka nau nena kan din dun reng lai chuan Taxi pakhat hian Zebra Crossing lai taka dingin a passenger-te chu a han chhuktir ngawt pek a nih chu! Han zilh hrâm duh teh mah ila, ruah a sur cherh cherh avangin kan en liam ta mai lo thei lo a. Kan sezawl chhuah a ni ber e. Zebra Crossing hi motor khalhtu tam takin an lo la hmel hriat lo hle mai. Inzirtir kan va ngai tak em! ka ti a ni.
Thil zuartu tam tak an rinawm lova, rinawm erawh an inti. An hawihhawm em, anni hi consumer-te tan an hlu thin! Kristian ramah hian thil zuartute tam zawk hi Chawlhni Kristian an ni a. Dik lo taka hlêp hreh lo, dâwt pawi sa lote an ni. Anni ang hi hmun tin, hmu tangah an awm! Pathian thu erawh duh tak, tawngtai mi an ni lawi si! Pawl tharna chang reng, mi dang sawi chhiat leh rel eng maha ngai lo an ni duh khawp mai. Thil sual leh thil tha pawh thliar hrang thiam lo khawpa thlarau chhia vâin a hruai sualte an ni. Hengho rilruah hian consumer right-in kua a hreuh thei lova, zung a kaih thei hek lo! Kristianna hi Pathian biak buk pawnah kan pawng sual mai mai thin a nih hi! Isua zirtirna hi kan va nunpui lo em ! tih chu Consumer-te ti ti ka sawi chhuah atang khan a lo lang bawk a ni.
Hei bakah chhungkaw tin innghahna eirawngbawlna LPG booking chungchang Gas Distributor pakhat thuchhuah ka rawn khar chhawng a. Gas-a eirawngbawltute hi consumer an ni a. Blue book-ah ziak a ni nghe nghe a. Chuvangin Gas hmangtute chu Consumer kan ni vek. ‘Kei chu Consumer ka ni ve lo,’ a tih ngawt theih loh! Gas book dan hre lova nutling patling awm fo hi a zahthlak satliah lo hle a ni.
Power & Electricity Department chûan tûn hnaiah electric consumer-te tan complaint thlenna tur Contact Number an ti chhuak thar a. Consumer-tute pawhin hei hi vawn that tlat tur a ni.
Hetiang hian P&E chuan an consumerte tan a pho chhuak a ni :
POWER & ELECTRICITY DEPARTMENT CUSTOMER CARE CENTER :
HARSATNA NEI TAN BIAK THEIH RENG KAN NI.
PP -0389-2322274
6009292340
8132801559.
Mizoram pûm tan heng number-ah hian phone theih a ni. Kawlphetha hi essential service , chhungkaw tinreng mamawh a nih avangin a pawimawh a. Englai pawha kan hman kan ti thei awm e. Complaint pawh a tam hle; keini ang duang pawh hian Complaint hi kan dawng ve mawlh mawlh reng a. Tih theih erawh kan nei tlem hle si a ni! P&E Department hian hotu fel fai tha tak tak an nei a. Mipui tan an tangkai hle a. An naute pawhin an vil tha thawkhat hle mai. Mahse, hetih lai hian mi tha lo an lo inphûm ru ve thin a; heng ho hian an mi felte an tihniam ta thin a, a pawi hle a ni!
Ka sawi duh pakhat chu mipui bawk hian kan mawhphurhna kan hre tawk lo, tih hi a ni. Mi fing leh rem hriaten an siam chhuah a, a hman dan an duan chhuah te hi chu lo zir thiam ve mai tur chu kan ni. Kan bat pawh a ni. Mahse, thiam tum lo, buai thlang zawk hi kan ni fur mai! A va hahthlak tak em! Consumer-te hi kan thatchhiat êm avangin malsawmna pawh a ni pha lo fo! Mahse, inzir la, thiam la, i tan malsawmna ropui tak a ni ngei ang.
Ka tawn hriat pakhat ka han zep lawk duh a. Hmanni lawk khan ka vah velnaah kuhva khawr cheng 20 man lek hi ka lei ve a. Ka han ei dawn a, kuhva rah phel khat chu, a lang lo lamah hian a lo dum hûam mai a ! Ka han kheuh a, a ngêt chu a tla ta ur ur mai a. Ka ngaihtuahna a ti thui hle mai ! Mizo thil zuarte hi Isua hnung zui ti rinawm kan inti a, he kuhva zuartu pawh hi Kristian tha tak a nih ngei ka ring; lâm pawh a thei viau mai thei.Khawhar inah lah thu a sawi thei viau mai thei. Mahse, a eizawnnaah a rinawm tlat lo a nih hi! Kuhva rah chhe zuartu ang hi eng zat tak sumdawng zingah awm ang maw? tiin he Consumer khawvelah hian ka hun tam zawk hi ka hmang mek a ni si a.
Ti hian ka ngaihtuah zel a, mi hausa leh retheite innghahna chu thil leitute kutah a ni a. Retheite retheihna ata dawm kangtu leh hausate hausaa siamtu chu consumer-te hi an ni. Consumer-te tilungawi lotu chuan Pathian pawh a tilungawi lo ngei ang.
Consumerte hriat atan:
Consumer leh Customer hi sawi pawlh a ni fo thin a. CPA 2019 ah chuan consumer chu thil leitu leh service leitu /hmangtu tih a ni a. Customer chu dawrtu tiin kan hre fiah thei mai âwm e. CPA-ah customer tih hi a lang lova, mahse, consumer leh customer tih hi thuhmuna ngaih a ni a. Sawi zawm a ni zel bawk.
Kum 1900 laihâwlah khan American sumdawng ropui tak mi pahnih Harry Gordon Selfridge leh John Wanamaker-te chuan Consumer is King tih thufing hi an lo chher chhuak a. Anni pahnih hi thil siam chhuah man bi tuk (fixed price) hmasa bertu te an ni a. Consumer is King tih leh Customer is King tih hi thuhmuna ngaih a ni thin a. Sawi pawlh a ni thin bawk. M. K. Gandhi kha chuan customer te chu Inleng pawimawh ber (most important visitor) a ti a. Hei hi tun thlenga kan nihna leh dinhmun chu a ni. Mahse, kan mawl luat avangin kan dinhmun leh nihna dik tak hi kan la chang ngai lo a ni. VIP Consumer /Customer zawk chu ngaihsak hlawh lo, tihretheih kan la ni zawk zel a ni.