Copa del Rey quarter-final:
Albacete muala chak Barcelona
Estadio Carlos Belmonte chhunga mipui 16,745 lutkhawm hmaah Lamine Yamal leh defender Ronald Araujo-te goal khat ve ve thun hmangin mualneitu Albacete lakah 2-1 hnehna an sualchhuak a, Thawhlehni khan Catalan team-in King’s Cup semi-final an lut.
Tun season Copa del Rey-a goal la thun ve lo Spanish rawlthar Yamal chuan minute 39-ah Frenkie de Jong-a siamsak hmangin goal hmahruai a tilut a, half time-ah defending champion Barcelona-in si khat faiin hma an hruai phawt.
Second half tir lam minute 56-ah Marcus Rashford-a corner chhuih atangin captain Araujo chuan Barca goal hnihna thun bawk mah se minute 87-ah Javi Moreno chuan mualneitu team si phurh pakhat zawk a sut then a, goal dang luh belh loin rin ai daiha kal thui tawh Albacete lakah Hansi Flick-a team an chak.
Tun season Copa del Rey-a giant killers an tih mai Albacete hi Spanish second division table lamah pawh sang pawl ni pha loin 12-na an luah pha chauh a, chuti chung chuan Nou Camp club an sut hmain La Liga table-a pahnihna luahtu Real Madrid an lo barakhaih tawh a; round hmasa lamah an ngam loh tura ngaih Celta Vigo an hneh tawh bawk a; Barcelona laka an lasi thawnthu kal tluang lai chhunzawm leh an tum laiin La Liga hmahruaitu leh Copa del Rey champion lai meuh chu an keuh tlu zo ta ngang lo a ni!
Tun kha kum 2005 hnu lama Barca leh second-tier Albacete intum leh vawi khatna niin, La Liga hmahruaitu team khan inkhel thunun zawk hle mah se Yamal-a goal luh hma thleng khan lehlam pawl goal zawnah ball an thawnlut zo lo!
Rashford leh Frenkie de Jong-te ball inpetawn zar zoin Spain international kum 18 mi Yamal chuan Albacete goalkeeper Raul Lizoain ven goal-ah season kal lai Copa del Rey bika a goal hmasa ber a thun a, inelna hrang hrang belhkhawmah chuan tun season-a a goal 14 tihluhna chiah a ni thung.
Manchester United atanga loan-a an hawh mek England forward Rashford chuan goal khung zo lo mah se assist vawi khat a nei leh a, tun season inelna hrang hranga goal leh assist vawi 10 (double figure) chin ve ve nei thei La Liga player pathumna chiah a ni.
Nizan quarter-final inkhel result tarlan hman lohah Deportivo Alaves-in Real Sociedad an mikhual a; Valencia mualah Athletic Bilbao an lut bawk.
Zanin Spanish Cup quarter-final match dangah Atletico Madrid-in Real Betis an luhkhung ve leh ang.
Nikum Seville khawpuia Copa del Rey final-ah khan extra time-ah 3-2-a an hmelma lian ber Real Madrid hnehin Barcelona kutah cup a lut a, an title kawl lai humhim tura an beihna kal mekah Catalan hoin semi-final an lut zui leh ta a ni.
Copa del Rey quarter-final: Albacete muala chak Barcelona
