Corporator leh LC-ten dan thar zir
Aizawl Municipal Corporation (AMC) chuan corporator leh local council pualin Thawhlehni khan bawlhhlawh sawngbawlna dan thar – Solid Waste Management Rules 2026 inhrilhfiahna a buatsaih a. He dan thar hi Ministry of Environment, Forest & Climate Change-in Environment (Protection) Act 1986 behchhana a duan, India ram puma kumin April 1 atanga hman tan a ni.
Chawhma hun hmanpuitu Aizawl mayor H Lalremtluanga chuan, kan tu leh fate tana chenna tlak khawvel kan siam theihna turin he dan thar hi duan a ni a, a hlawhtlin theihna atana kan zavaia thawhho a ngai dawn tih a sawi. Bawlhhlawh khawn leh sawngbawl kawnga AMC-a rawtna leh thu thlen duh an awm chuan an inhawng reng tih sawiin, bawlhhlawh thliarhran chu a hautak hle chungin, an ti thei ve zel a, dan thar pawh local council, khawtlang hruaitute leh mipui thawhhona azarah a hlawhtlin leh ngei beisei chungin, thawhho puiah a sawm tih a sawi a ni.
Chawhnu hun hmanpuitu executive corporator i/c Sanitation & Solid Waste Management K Lalrodinga chuan, mipuiin thlir dan thiam zawnga an thlir a, an rilru hmin a tul, tiin, “Kan tanrual chuan Aizawl khawpuiah hian hmasawnna kan hmu ngei ang,” a ti.
SWM Rules 2026-in a phut angin, bawlhhlawh a bo a bang awm loa khawn khawm leh sawngbawl a pawimawh dawn tir zirho a ni a, hmalak dan tur sawi a ni. Bawlhhlawh ngah zual (bulk waste generator) ho tih tur, chi li-a bawlhhlawh thliar hran tur thu, a khawn khawm dan leh pawimawh dang inhrilh a ni a. Bulk waste generator-te hian dan tharin a phut angin an bawlhhlawh an sawngbawl a tul tawh dawn a ni.
He dan thar ang hian bawlhhlawh thliarhrang tha lo leh a hmun loa bawlhhlawh paih ho chungah na zawkin hremna pek theih a ni dawn a, zawm tha lo leh thu awih lo chu man theih an ni tawh dawn a ni.
Corporator leh LC-ten dan thar zir
