Corruption dotute tha tichak
turin Congress-in ngen nawn
Corruption laka Mizoram a fihlim theihnan state sawrkar chu Central Bureau of Investigation hnenah general consent tak tak pe tur leh Mizoram Lokayukta tihniam zawk ni lo, thuamchak zawk turin an ngen nawn tih Congress party chuan an sawi.
MPCC senior vice president Lalnunmawia Chuaungo chuan, thuthar thehdarhtute kaltlanga an puanchhuah bakah chief minister hnenah ziakin CBI hnena consent pek chungchangah rawtna an thlen bakah Mizoram Loayukta tih chakna turin rawtna an thlen a, kumin July 10 & 11 a an thlen tawh chu thla hnih dawn a ral hnuah pawh a chhanna an la hmu lo mai ni loin, acknowledgement pawh
an la dawng loa. An rawtna leh ngenna tih hlawhtlin tuma hma lak a awm pawh hriat tur a awm lo tih a sawi.
Tunhnai Assembly Session-ah chief minister-in CBI general consent an pekah state employee a huap lo chu anni’n huap rawh se an tih theih a ni loa, tu pawh sawrkar se, hei bak hi an pe thei lo nia a sawi thu sawi chhawngin, “State sawrkara thawkte huap tura CBI hnena general consent pek hi Delhi Special Police Establishment Act 1946 section 6 hnuaiah state sawrkar thuneihna a ni a. Dan hlui thlaktu dan thar siam emaw, eng dan dang hnuaiah mah khapna a awm lo. Chief minister hian thudik lo hmanga mipui rilru hruaikawi tum tawh lo se kan duh,” a ti.
ZPM sawrkar chuan CBI hnena general consent pek an ngam lo a nih pawhin, Mizoram Lokayukta-in state sawrkar phalna la kher loa, tul a tih huna CBI a hman theih nan consent pe turin an ngen tih a sawi a. An intiam anga corruption laka fihlim an tum tak tak a nih chuan hlauh tur a awm lo tih a sawi.
Lokayukta chungchangah pawh, Investigation Wing leh Prosecution Wing hotu lute dinhmun chu additional secretary level-a dah let tura an ngenna; Lokayukta dinhmun, pawimawhna leh thuneihna ti dal tura Section 13(3) leh Section 14 proviso an tih danglam leh an belh chu paih leh tura ngenna; Section 19(5) leh Section 28(1) ti danglam a, Lokayukta-in state sawrkar phalna la hmasa loa CBI a hman theihna an chhuhsak leh, state sawrkar phalna la hmasa loa state sawrkar hnuaia hnathawk chhui theihna an chhuhsak pe let tura ngenna; Mizoram Lokayukta-in state sawrkar phalna la hmasa kher loa state sawrkar hnuaia thawkte chhui theihna dan belh tura ngenna chu tihlawhtling turin sawrkar an ngen nawn tih Lalnunmawia Chuaungo hian a sawi a ni.
Corruption dotute tha tichak turin Congress-in ngen nawn
