Mizorama kohhrante inzawmkhawmna Council of Churches in Mizoram (CCM) chu October 27 hian hawn a ni dawn ta a. Tun dinhmunah CCM-ah hian kohhran 8 an awm mek a, member hi an pung chho zel turah ngai ila.
CCM kalphung tur chu: “Thurin (doctrine) leh chin dan (tradition) lama inanlohna dah tha a, mimal nun, khawtlang leh sawrkar thlenga inrelbawlna tih hmasawnna kawnga kohhranten hma an lak theihna tura inpumkhatna kalpui’ tih a ni.
Chumi awmzia chu, ‘kohhrante hian thlarau lam thil chauh ni lo, ram inrelbawlna thilah pawh, hmasawnna a thlenna turin i thawkho ang u’ tihna a ni ber awm e.
Mizorama Krista zuitu (Kristian) inti theuh theuh zingah hian, kohhran (denomination) hrang hrang 78 a awm a; hei hi Gospel Centenary lawm kum 1994-a data kha a ni awm e. Chanchintha thlen kum 100-na kan lawm khan, kohhran hrang hrang 100 thuak a piang hman tihna a ni.
Mizoram, mihring tlemte awmnaah hian, eng vanga kohhran hrang hrang heti zat hi awm thei nge a nih? tih hi zawhna pawimawh tak a ni awm e. Chanchintha hril tura koh chhuah (koh hran), Krista-a pumkhat nihna nei intite hian, taksa thila inpumkhatna pawh hi kan mamawh hle tih a lang awm e.
Kan ram dinhmun han en hian, a enga kimah mai hian ‘chhe ber’ dinhmun hi kan hauh fai ta vek emaw tihturin a manganthlak tawh a. Kohhran hrang hrangten pheikhai rual taka ram inrelbawlna hnuaia thil tha lo leh dik lo siam thatna kawnga pen chhuak tlang tura thawhhona tur an ngaihtuah chhuak ta pawh hi, an tihtur awm tak, rawngbawlna peng pawimawh tak a ni, a tih theih awm e. Kan ram dinhmun hi mutmawh hnarmawha neih a tul tawh a, midang tih tura dah mai lova, mi tin hian mahni theihna zawn theuha tan kan lak (tanrual) a tul takzet tawh a ni.
Council of Churches in Mizoram (CCM)
