Counselling Centre pantu Mi sang 7 chuang an awm

Mizoram Synod-in a ruahman Family Guidance & Counselling Centre (FG&CC) chu kuminah mi sang 7 chuangin an pan tawh.
Synod hian Counselling Centre 9 – Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah a nei a; tunah hian Chanmari Aizawlah Centre hawn belh leh tura ruahman mek a ni. Heng Counselling Centre 9-ah hian kumin November 14 thleng khan mamawha pantu (client) 59395 an neih tawh a, kumin bikah mi 7361-in an pan.
Kumin November 15-28 chhung khan FG&CC-in Pastoral Care & Counselling Training vawi 31-na an buatsaih a, tun tumah hian Mizoram Presbyterian Kohhran pastor 24 bakah Myanmar atangin pastor 5 an tel a, an vaiin mi 29 an ni.
Training kharna, ‘graduation service’ hmanpuitu Synod moderator RevDr C Chawnghmingliana chuan counselling rawngbawlna chu thil pawimawh leh huhphurhawm tak si a ni, tiin, Pathian rinchhan chunga he rawngbawlna hi nasa zawka kalpui zel a ngai tih a sawi.
FG&CC hian pastor leh kohhrana rawngbawltu pawimawh (church leader) te pualin counselling training a buatsaih thin a. Pastor-te pual hian kum 1992 atang khan buatsaih thinin pastor 561 an training chhuak tawh a. Church leader-te pualin kum 2002 atang khan vawi 37 buatsaih tawhin mi 838 an training chhuak tawh a ni.