Aizawl District Court-ah hursualna tuartu naupang leh naupang an nuten lung ina an tanpuite leh chhan hrang hrang avanga naupang, court-a inlan leh kal ngaite tan Child Welfare Officer’s office leh Children’s Room siam thar a ni.
A hawngtu Aizawl District & Sessions judge Joel Joseph Denga chuan hursualna tuartu naupangten court-a harsatna an tawh thin tih tawp a nih theihnan hetiang hmunhma hi mamawhna a san thu leh District Court zawng zawngah siam zel a nih theihnan Mizoram State Commission for Protection of Child Rights (MSCPCR) chuan hma la thei se a tih thu a sawi a. Court building leh a chhehvelah pawngsualtua puh leh a tuartute chu a hring a hrana inhmuh palh theih a a nih avangin a tuartu naupangten court-a evidence pek chungchangah harsatna an tawk zui thin a, rilru lamah pawh harsatna an tawh phah thin avangin a tuartu naupangte chu tha taka zawhna an chhan theihnana lo fuih a, huaisenna an neih theihna tura lo buatsaih a tul tih a sawi.
Mizoramah POCSO victims compensation pawh sawrkar sum harsatna avangin la pek loh tam tak a awm tih Joel Joseph Denga hian a sawi bawk.
MSCPCR chairperson Dr C Lalsangzuala chuan hursualna tuartu naupangte leh naupang, an nuten lung ina an tan pui leh, chhan hrang hrang avanga court-a inlan ngai naupangte tan he hmun hi siam an ni tih a sawi a. Court-a kal ngai naupangte ngaihngam taka an awm theihnan Children’s Room hi siam a ni tih a sawi. Naupangte tana hmun nuam a nih theihna turin Women & Child Development department chuan bungrua leh hmanraw chi hrang hrangin a thuam tih a sawi a ni.
Court-ah Children’s Room siam
