Hun engemaw chen a reh hnuah kum laihawl atangin covid-19 a rawn inlan leh a, tun hnaiah a vei an pung bawk.
IDSP te’n an chhinchhiah danin, August ni 23 thleng khan tun thlaah Covid-19 hri vei hi mi 32 an awm tawh. August ni 23 khan a hnuhnung ber chu damin a chhuak.
April, May leh June-ah te hri vei an awm lo a, June atangin hri vei an awm leh. June thlaah mi pakuain hri an vei a, July-ah mi 10-in, August-ah mi 32-in an vei tawh. August-ah hian a pung hluai a ni.
January-ah khan mi pahnihin hri hi an vei a, February-ah pathumin an vei.
Health department atanga thu dawn danin, tun hnaia hri vei hriatchhuahte hi Covid-19 na taka vei han tih tur an ni lo a, natna dang vei, rinhlelhawm vanga endika Covid-19 an lo vei tih hriatchhuahte an ni.
Natna dang vanga inentir vek an ni a, damdawi ina enkawl lai an ni tlangpui. An awm danah Covid-19 hri vei an nih a rinawm vanga endik an ni a, ZMC-a RT-PCR hmanga endik vek an ni.
Kumina hri vei hriatchhuah tawhah hian Serchhip district mi pakhat a awm a, mi dang chu Aizawl district mi vek an ni.
Covid-19 hri vei pung leh
