Tunlaiin India ram hmun thenkhatah Covid-19 a leng leh a, Mumbai-ah chuan mi pahnihin nunna an chan phah. Mizoram chu he hri lakah hian a la himah ngaih a ni a, hmarchhak state dangte pawh an buai lovah ngaih a ni.
Integrated Disease Surveillance Programme (IDSP) hotute’n Covid-19 lakah Mizoram a him rihah ngaih a nih thu an sawi a, amaherawhchu, he hri laka inralring turin a theih ang anga inbuatsaih chu a ngaih thu an sawi.
IDSP hian tun hnaiah Mizoram dinhmun an thlir ho a, kuminah Mizoramah Covid-19 hri kai hriatchhuah an la awm lo tih an sawi.
Hrileng a zia tak zelah khan Covid-19 hri kai leh kai loh endikna hi ZMC-ah chauh dah a ni ta a, endik ngai chu an awm ve deuh reng a, mahse kuminah hri kai hriatchhuah an la awm lo tih chu an sawi dan a ni.
An chhinchhiah danin, Mizoramah Covid-19 hri kai hriatchhuah hnuhnun ber chu nikum October thlaa mi a ni a, chumi hnuah chuan hriatchhuah an awm rih lo.
IDSP hotute chuan National Centre for Disease Control (NCDC) ngaihchan a nih thu leh NCDC lam pawhin an thu lo ngaichang tura an tih thu te an sawi a, chumi chhung a hmanraw lamah a theih ang anga inen a nih thu, PPE pawh tul thuta hman tur a awmah ngaih a nih thu te an sawi.
Sorkar laipuia ministry of health and family welfare-in an chhinchhiah danin tun hnaia he hri rawn leng lehah hian India ramah mi 250 chuangin an vei tawh a, Kerala., Maharashtra leh Tamil Nadu-ahte hri hi a leng nasa zual.
Covid laka himah inngai
