Cricket World Cup-ah thilmak a thleng leh
Afghanistan lakah Pakistan an tlawm!
Thawhtanni khan Chennai khawpuia ICC Men’s Cricket World Cup match-ah chak lo zawk tura ngaih ngheh Afghanistan chuan wicket riatin Pakistan an hneh a; tun kha one-day cricket bika cricket khel ram ropui zinga mi Pakistan an hneh vawikhatna a ni.
Pakistan hian vaw hmasain, over 50-ah run 282 siamin wicket sarih an hloh a; Afghanistan bat hun thlengin, over 49-ah run 286 puitlinin target an khum der mai a, wicket hnih chiah an hloh nghe nghe!
Tun tournament kal lai bul tantirhna lama England lo barakhaih tawhtu Afghanistan tan hian Ibrahim Zadran chuan ball 113 a hmachhawn atanga run 87 thawkchhuakin, Afghan tana a vuak lama thawhhlawk dang Rahmat Shah chuan ball 84 atanga run 77 puitlinin, Rahmanullah Gurbaz pawhin ball 53 atangin run 65 a hlapchhuak ve bawk.
A vawm lamah rawlthar spinner Noor Ahmad Lakanwal chuan a thawhhlawk ve thung a, he Afghan cricketer hian ball 49 a vawm atangin wicket thum a la tling. Nikum June thla mai khan ram tan international debut a nghakchhuak a, World Cup kal meka Pakistan an hnehna kawnga player langsar a ni thei.
Afghanistan hian table-ah parukna luah chhoin, a mawngphahah champion lai England an chhuk en!
Pakistan tan hian captain Babar Azam chuan run 74 hlapchhuak mah se a team tlawm tur chhanna’n a tawk zo lo.
Tun kha ODI bika ram pahnih vawiriat insutna niin, a dang zawngah Pakistan an chak fai vek a; Chennai inkhelah pawh Afghanistan bawk kha tlawm leh tura ngaih ngheh an nih laiin tournament kal laia beisei loh result lian dang an thlentir leh a, World Cup-a an inlan ve tawhah an vawithum chakna a ni nghal bawk.
Cricket World Cup match-a Afghan-ho chak dang chu kum 2015-a Scotland an hneh kha a ni.
Table-a pangana luahtu Pakistan hi Chennai-ah cham chhunzawmin, Zirtawpni hian South Africa an tum zui leh dawn a; Thawhtannia Sri Lanka laka thilmak dang beisei leh turin Afghanistan chuan Pune lam an pan thung.
Defending champion England hneh hnua team tha dang Pakistan an sawp zui leh hnuah Afghanistan captain Hashmatullah Shahidi chuan Pakistan hneh boruak kha a nuam veng veng tih sawi chungin target an um dan kha a professional takzet niin a sawi a, kha hnehna khan game dang an khelh leh zel turah pawh a puih ngei a beisei thu a tarlang tel.
Shahidi chuan, “Quality cricket kan khel a; team chhungah rinna kan nghat tlat a; tournament tan hlim khan ka team-te hnenah kan ram leh kan chipuite tan history thar siam ka duh thu ka hrilh a, sawi ang tak takin England kan barakhaih a, tunah Pakistan a ni leh a…
“Kan bowling a tha takzet a, a bik takin kan spinner-te’n an thawhhlawk a; Noor kha chance kan pe a, a lakah rinna kan nghat a; a vuak lamah ni se kan bul tan dan kha inrintawkna min siamsak a ni,” a ti.
Pakistan captain Babar Azam ve thung chuan an chak loh kha an team tan a na ngawih ngawih tih sawi chungin, an run siam chu a tha thawkhat niin a sawi a, an chak loh chhanah bowling lam a kawk na deuh.
“World Cup-ah reng reng chuan kawikawm thin ang thapin department pathumte hi kan tan mar pat a ngai a, tah chuan kan hlawhchham a ni. Afghanistan khan an khel tha em em a, department pathuma kan chetfuh kim loh ang kha an ni ve lo a, run kan pe tam a, kan tuar ta a ni. Kan match khelh leh turah hian kawngdik kan zawh leh nghal a ngai ang,” Azam chuan a ti.
Afghanistan coach Jonathan Trott chuan BBC Sport hnenah an hun tawn avangin an zauthau a ni ber tih a hrilh a, inkhelh lam buaipui loa an chak dan thlirlet hun a nih rih thu leh an phurna leh thathona sosang tak chu nghah-daih rih phawt a tul thu a sawi!
Cricket World Cup-ah thilmak a thleng leh Afghanistan lakah Pakistan an tlawm!
