Cristiano Ronaldo-a’n Portugal training camp a chhuahsan chhan a puang

Cristiano Ronaldo-a’n Portugal training camp a chhuahsan chhan a puang
Tunlai football khawvela miten an bengkhawn an ngaihven Portugal national football team training-na atanga sawi lawk em em pawh awm lova an thiampuipa leh football khawvela huhang nei lian ber te zinga mi Cristiano Ronaldo a chhuah tak daih chungchangah amah, Ronaldo ngei a tawng chhuak ta a, an coach Jorge Jesus chu a insawi anga a awm loh thin avanga training camp chhuahsan a nih thu a sawi.
Football superstar Ronaldo hian thuchhuah sei zet mai neiin, Portugal national team training camp atanga a chhuah tauh thuhna chhan hi a puang a, “Thutiam dang an bawhchhiat leh hun nghak buai lovin camp chhuahsan mai ka thlang ta a ni,” tiin Instagram-ah a post a, “Midang te nena kan inlaichinnaah hian ka tan chuan thudik hi a pawimawh ber a. Ka natna tur pawh ni se thudik chu min hrilh mai rawh u,” a ti.
Ronaldo, kum 41, chuan July thlaa an head coach Roberto Martinez thlak a Jorge Jesus, kum 72, an coach a nih atanga boruak hi inmung tawh niin a tarlang a. Wales, Norway leh Denmark te nen game an khelh hmain team chungchang an sawi duunnah Jesus chuan Norway leh Denmark khel tura an zinchhuah hunah Ronaldo chu team squad-a tel ve lo turin rawtna a nei ni a sawiin, Ronaldo chuan, “Game hmasa ber ka khel ang a, chumi hnuah Portugal-ah ka lo awm ang a, Dragao-a match kan khelh leh dawnah team zawm ve leh turin min ti a. Mahse, he rawtna hi ka pawm lo nghal a. Ka tan pawm chi a ni lo. Ram pawnah match khel ve lo mah ila team captain ka ni tho si a, chutiang ni chunga Portugal-a lo awm daih kha example tha lo tak a ni ang,” a ti.
Chutah Jorge Jesus chuan September ni 27-a Norway nena an inkhelh dawnah minute 30 chhung khel turin a tileh ta zawk ni a sawiin Ronaldo chuan, “Ka physical recovery leh khelhho dan tura a tha zawk tur ka ngaihtuah chuan hemi ni ian khelh loh tha zawkin ka hre nain, ‘ka aw’ ka tho a. Minute 30 chhung khel tur ka nih avangin lo inpeih turin min ti ta a. Halftime atangin ka intilum tan tawh a, hun a liam zel a, min khelh tir ka miah lo. Head Coach-in a sawi angin a ti lo,” a ti.
Ronaldo chuan match zawh atanga ni hnih hnuah coach chu hmuin, tlang reng rawng takin thil a sawipui niin a sawi a, chutah chuan coach chuan press conference neiin, Norway an hmachhawn tuma thil awmdan a sawifiah ang tiin an inrem ni a sawiin, “Minute khat pawh inkhelh ka dil loh thu a puang ang a, Head Coach ngeiin khel tura a ruahman zawk a ni a, khelh tir leh si lo a min lo warm up tir chu an tihsual a nih thu a sawi ang,” a ti.
Mahse, September ni 30-a press conference-ah chuan coach Jesus chuan thildang daih sawi chhuakin, a hma ni a an pahniha an indawrna letling hlauha thil a kal tak avangin camp a chhuahsan ta niin a sawi a, a insawi anga a awm loh leh tak zel avangin training camp a chhuahsan ta mai niin a tarlang.
Ronaldo chuan, “Camp ka chhuahsan avangin National Team-a ka khelhpui te lakah thupha ka chawi a, Portuguese mipui te hnenah thupha ka chawi bawk a, mahse, mi an insawi anga an awm miau loh chuan, keimahah chuan a nghawng a lian thin. Khata tang kha chuan ka awm ve khan group tan a tha lo zawk dawn ni a ngaihna ka nei ta a, ka tangkai lo ni a ka inhriat huna ka tih dan tur ka lo sawi fo tawh angin ka ti ta mai: ka puahthuah ka tel a, ka haw ta mai,” a ti.
Hetiang boruak avang hian inkhelh a chawlhsan ta tihna a ni lo a, Ronaldo chuan, “Ka fans zawng zawng, a bikin Portuguese te hnenah hei hi ka tiam duh, farewell match tum hnih khat chu kan la nei ang chu; chutiang tihna tur hun chu a la awm ang. Ka dam that chuan, club tana khel zelin, goal pawh kan la thun belh mah na, ka chunga inhremna an lekkawh (suspension) a zawh hun chuan kei chu vawiina ka inpeih ang tho hian kan National Team tana khel turin ka inhawng reng ang,” a ti bawk.