Mizoram Common Services Center (CSC) chuan an din champha kum 15-na chu July 26 khan Aizawlah an lawm.
Chawhma hunah Village Level Entrepreneur (VLE) titha pahnih – C Lalrindika, Kolasib district leh Lalramdinmawia Hringngen, Aizawl district te chawimawi an ni a. Chawhnu hunah CSC leh India Oil Corporation Ltd hnuaia distributor-ten thawhhona thuthlung (MoU) an ziak a. He inremna in a tum ber chu, LPG distributor-te awm lohna khuaah CSC-ten mipui awlsam zawk nan eirawngbawlna gas an sem thei tawh dawn a. CSC pakhatin distributor hnen atangin vawikhat lakah bur 7 zel a lak theih bakah gas connection thar leh booking pawh a tihsak nghal thei dawn a ni.
CSC hi sawrkar laipuia Ministry of Information & Communication Technology hnuaiah kum 2009 atang khan mipuiin awlsam zawka sawrkar an dawr theih nana din a ni a. Service hrang hrang – tribal, income, residential certificate, Aadhaar, banking, digipay, mini ATM, pancard, mobile recharge, insurance hrang hrang, PM Welfare Scheme, agriculture, health, education leh skill, legal, Grameen e-store, tours & travels leh a dangte mipui hnenah service an pe a; Mizoramah tunah CSC 1126 awm mekin, hengte hian sawrkar kum kalta chhung khan CSC service hrang hrang atangin cheng vaibelchhe 69 chuang an thawk chhuak a ni.
CSC kum 15 tlin an lawm
