Kumin June 16-a Civil Services (Preliminary) Examination neih tak result chu July 1 khan tihchhuah niin, Synod Resource Centre atanga inziak tling Lalremsiama Darchhun hnenah Mizoram Synod hnuaia Zirlai Viltu Committee chuan incentive cheng singriat an hlan a. SRC hian 2021 atangin Prelim-a Mizo inziak tlingte hnenah Incentive hi a pe thin a, kumin 2024 atang hi chuan Synod Resource Centre atanga tlingte chauh an pe ta a ni.
Kum dangah Prelim-a tlingte hi an awm nual thin; kuminah hian engzat chiah nge tling tih tun maiah hriat a la ni lo. Tun tum Prelim-ah hian candidate nuai 13.4 chuang an inlan a, chung zinga 15,000 vel chuan Prelim an paltlang a, 1.1% an tling tihna a ni. Hetiang percent tlemte zinga Mizo tlangval a tel thei hi a chhuanawm hle a, hlawhtlinna a chan ngei beisei ila. Main Eam hi kumin September ni 20 atangin an bei tan leh dawn a, tuna central sawrkar hnuaia hnaruak hnawhkhah tur vacancy awm zat hi 1056 a ni.
All India Services bakah Central Civil Services hrim hrimah pawh Mizoram atanga inziak tling kan awm ta mang lo a. All India Services-ah phei chuan kum sawm chuang a ni ta, lut thar kan la awm leh ta lo. Hei hi kan dinhmun a nih avangin sawrkar pawhin theihtawpin helamah hian tan a la thar tih ‘Super IAS’ thawm pawh kan hre vek a. Chutih rualin mimal, pawl, kohhran leh Foundation hrang hrangin anmahni theihna zawn theuhah thahnemngai takin hma an la a. Kan zirna in lamah pawh education system ennawn duhna a lo piang a, education reforms neih tumin hma thar kan la mek niin a lang.
A beih chu kan bei nasa chho leh ta viau; mahse, inhruipawhnaa tanhmun siam rem si lova tawng pawng tan vakin awmzia a nei lo ang deuh hi kan ni maiin a ngaih theih. Inhruipawh dawn hian, uluk taka tanhmun siam rem hmasak a tul thin a, inhruipawh tan tawh hnua pawn lam atanga rosgula lo inbarh chiam chiam kha a sawt tawh lo thin. Chutiang bawkin, thlai tiak pawh a zung lam leitha leh tui pe uluk vak si lova, a puitlin hnua than thattir tuma a zik lama tui leih vak emaw, a zamna tur thing lo phun sak vak emaw kha awmzia a awm tawh thin lo ang deuh hi, kan ni bawkin a ngaih theih awm e. Eng vangin maw? kan tih chuan, kan education system hi a tobul lam kan uluk loh vang a ni, a tih theih ang.
Hei hi research nei chunga sawi ni lo mah se, kan dinhmun leh, kan kalphung langtlang reng atang hian, huai angreng takin ‘a tobul lam dik loh vang a niang’ tih chu a sawi theih awm e. Chuti a nih chuan, bul tan that dan tur chu a lang reng tihna a ni.
CSE (Prelim)-a inziak tling…
