Centrally sponsored scheme hnuaia lak, state sawrkar hnuaia thawk zui ta chuan lungawilohna leh thil phut an nei a, an thil phut hi sawrkarin a tih hlawhtlin sak lo a nih chuan ni thum chhung a huhoa casual leave lak an tintuah.
All Mizoram CSS Employees Coordination Committee (AMCECC) chu state sawrkar hnuaia an dinhmun siamthatna tura hma an lakna kalzelah sawrkar atanga thu lawmawm an hmuh loh avangin an kal zel dan tur relin Nilaini khan general body meeting an nei a, Aizawl chhung bakah Mizoram hmun hrang hrang atangin an member 1000 chuang an tel.
General body meeting-a thuchhuak chuan, CSS employees tana sawrkarin regularisation scheme a siamsak chu an hman ve theihna tura siamrem ngai siamrem sak tumin sawrkarin ngaihtuahna a seng miah lo niin a sawi a. DP&AR minister thurawn anga AMCECC-in kumin May 19-a representation a thehluh chu tih bo sak an ni a, a thlenna tur official hnen a thleng lo tih a sawi.
‘Regulariation of CSS Employees Scheme 2024 a taka kan hman theihnan kan representation thehluh hi rang taka min ngaihtuah sak a, min tihhlawhtlin sak turin sawrkar kan phut a ni,’ a ti.
Mizoram sawrkara thawk CSS employee-ten Regularisation Scheme 2024 hnuaia department hrang hrang proposal an hnawl zel lai a, CSS pawh ni lo, Health department-a thawk health worker 31, MR skilled II, provisional employee-a convert-te he dan hmanga dah ngheh an ni chu induhsakna uchuak a ni, tiin, tun hnuah thleng tawh lo se an ti a. An appointment hi cancel an phut tih a sawi.
CSS hnuaia thawkte ‘dan lo anga lak’ tia chief minister-in kumin Independence Day lawmnaa a sawi chu na an tih thu sawiin, ‘CSS hnuaia thawkte hi dan ang thlapa lak kan ni a, dan lo anga lak kan awm chuan, dan lo anga latute chu zawng chhuak a, action na taka lak ni rawh se,’ a ti.
Heng point hrang hrang hi tih hlawhtlin ngei an phut a, sawrkarin a tih hlawhtlin sak loh chuan September 9, 10, 11 chhung mass casual leave lak nise, hemi chhunga an duh anga sawkarin hma a lak loh chuan kal zel dan tur ngaihtuah leh nise an ti.
AMCECC hruaitute sawi danin, CSS employee-ten an tana regularization scheme siam hmang tura harsatna awm thin chu lungawilohna pawh an lo lantir tawh a, sawrkar nen inbia-in harsatna chingfel tura inthlah a nih bakah state sawrkar thurawn angin representation an lo thehlut tawh a. Sawrkar atanga thu lawmawm engmah a awm loh avangin general body meeting neih hi an rel a ni.
Tunah hian Mizoram sawrkar hnuaiah CSS employees mi 10000 chuang an awm a, Coordination Committee hnuaiah hian department hrang hrang atangin association 16 an awm a ni.
CSS hnuaia thawkte lungawilo Huhoa casual leave lak tintuah
