CSS kaltlanga Mizoram sawrkar hnuaia thawkten sawrkar hotute hnena thil phut an neih chu an zirchiang mek a, zirchian phawt loh chuan inrem dan kawng zawnga inbiak lam hawi la rem rih lo tih Deparment of Personnel & Administrative Reforms hotute chuan an sawi a. Sawrkar chuan engtin pawh ti dawn se, India danpui-in kalhin a che thei lo tih an sawi.
Thuthar thehdarhtuten an zawhchiannaah DP&AR commissioner K Lalthawmmawia chuan, All Mizoram CSS Employees Coordination Committee (AMCECC) in thil phut an neih, sawrkara an thehluh hi kumin September 2 khan ama hnenah an rawn ngaihven a, an representation chu haichhuah tur an hmu ta mai loa, tlawmah la loa thehlut nawn leh mai tura a lo ngen angin an thehlut leh a, Aizawla Prime minister lokal tur buaia sawrkar a phek buai tak avangin ngaihven hleithei loin an awm a, nawrh leh nawr vang ni loin tunah an zirchiang chho mek tih a sawi.
Zirchian mek a ni chungin, AMCECC duh dan tlangpui atang chuan, tih awm leh awm loh erawh a lang deuh ruak tih a sawi a. Chutihrualin an la indawr miau loh avangin thu tam sawi theih a la ni lo tih a sawi a ni.
‘Regularization of CSS Employees Scheme 2024’ lo chhuah dan chu, SSA thawktuten High Court-a Mizoram sawrkar an khinna atanga High Court-in sawrkar lam bawhzui tura thu a rawn (option) a siam pathum zinga pakhat bawhzuina a ni tih DP&AR commissioner hian a sawi a. India danpui Article 14 leh 16 kalh lo tura uluk thei anga duan niin, he scheme atang hian ‘check list’ a piang a, check list hi sawrkarin a duh dan ang anga a duan niloin, danpui kalh loa hma a lak zuina tura scheme atanga piang zawk a ni tih a sawi.
“Regularization scheme min siamsak te te a, kan luh ngheh theih lohna turin check list min siamsak leh si a, an tih hi chu a dik loa; dan ang taka lut te chauh dah ngheh an nihna tura siam a ni,” a ti.
Tuna CSS hnuaia thawk zingah, danpui Article 14 leh 16 kalh loa, dan ang taka lak an ni tih tihfiahna turah a theih ang anga fan luih an tum viau naa, a nghet tura danin a phut ang nei lo an tam hle nia a lan avangin, chu chu tuna an buaina a ni tih K Lalthawmmawia hian a sawi a. Dan dik taka lakte chu post awm dan azira dah ngheh chhoh niin, AMCECC member zingah an awm nual thei a; Health department hnuaia health worker 31 lak ngheh tak ho pawh an tel tih a sawi.
Health worker dahngheh takte CSS hnuai ni loa sawi chu a dik lo tih sawi bawkin, a tirah muster roll anga lak chu an ni ngei a, CSS zinga pakhat – National Health Mission hnuaiah infrastructure maintenance fund atanga chhawr an ni a. CSS thawktu dang ai chuan an kawng chu a dang hret naa, CSS atanga hlawh la tho an ni tih a sawi. Lak an nih danah MR/ provisional employees tia koh leh sawi an nih avangin, CSS huangchhung atanga talchhuah an tum zawk a, mah se, lak an nih dan hi CSS hnuai tho an nih miau avangin sawrkar kalphungah a rem loa, regularisation scheme a chhuah khan, he scheme-ah hian an leng ve tho si a, dan dik taka lak an nih bawk avangin, scheme nawrnaah tello mah se, scheme leh check list siam paltlang thlapin dah ngheh theih an ni ta tih a sawi a ni.
AMCECC thil ngen hi an zirchian zawh hnu ah, sawrkar hotute thu angin inremna kawng zawnga inbiak zui mai pawh theih turah an ngai tiin, DP&AR commissioner hian zawhna a chhang a ni.
Hetihlai hian AMCECC chuan Thawhlehni tlai khan an member-te zawm tur thuchhuah siamin, phut neia sawrkar an nawr meknaah inbiakna a la awm loh avangin September 17 atangin tiam chin awmloin nawrh an huaihawt a, mahni thawhna hmunah tumah kal lo turin an inhriattir.
CSS thawkte thil ngen zir mek Danpui kalhin kan che thei lo – DP&AR commissioner
