Centrally sponsored scheme kaltlanga Mizoram sawrkar hnuaia thawkten ‘Regularisation of CSS Employees Scheme 2024’ hmanga dah ngheh phuta sawrkar an nawr meknaah vawiin – September 16 atang hian sit-in demonstration neih an tum a. Neih an tumna MINECO huamchhungah Aizawl district magistrate chuan mi 5 aia tam punkhawm phal lohna thupek a tichhuak.
The Aizawl Post-in a biakpawhnaah he chanchin buatsaih lai hi chuan All Mizoram CSS Employees Coordination Committee (AMCECC) chuan an tum dan thlak tumin an inrawn mek tih an sawi a. An thil phut nawr erawh kaktlangpui ngei an tum tih an sawi.
AMCECC hian Septemebr 13 khan sit-in demonstration neih tur chungchang an ngaihtuah nawnnaah Aizawl leh a chhehvela an member-te chu MINECO-a open gym bulah punkhawm nise, Mizoram hmun dangah hian an Sub Hqrs. huaihawtin neih nise, heta kal remchang thei lo chu an awmna khua/ block ah Sub Hqrs. remtihna in sit-in demonstration hi neih nise, an ti a ni.
Thawhtanni khan Aizawl district magistrate thupek tichhuakin, sawrkar laka thil phut neiin pawl lungawilo, nawrh huaihawt mek an awm tih a dawn thu a sawi a. A hnuaia hnathawkten harsatna an tawh loh chu sawrkar duh dan ber a ni, tiin, thil duhawm lo a thlen lohnan leh thlamuang taka sawrkar hnathawkten an hna an thawh theihnan Aizawl district mipui zawm tur, danin thuneihna a pek angin, sawrkar office awmna hmun hrang hrang – Raj Bhawan, Chief Minister’s Office, Mizoram Assembly Secretariat, MINECO adt. leh a chhehvelah sawrkar, politics, sakhuana, vantlang leh thildang eng vang mahin mi 5 aia tam punkhawm leh bengchhen khap a ni, a ti.
He thupek hi chhuah a nih atangin thla hnih chhung huam tur a ni a. Thupek bawhchhia an awm a nih chuan Section 223 of BNS hmangin an chungah action lak a ni dawn tih a sawi a. He thupek hian dan leh thupek kengkawhtute erawh a huam lo tih a sawi.
Thawhtannia ZPM party office inkhawmah adviser to chief minister (Finance) TBC Lalvenchhunga chuan, CSS hnuaia thawkte state sawrkarin a dah ngheh theih loh chhan chu danin a rem tih loh vang a ni tih a sawi a. Thawhtanni veka MNF office-a inkhawmah an party general secretary Er K Lalsawmvela chuan tuna chief minister hian CSS thawkte hi inthlanpui hma khan dah ngheh a lo tiam tawh laiin, a CM hnuah dan loa lak, tiin, a puh ta thung tih a sawi a ni.
CSS thawktute punkhawm tum Sawrkarin punkhawm a phal lo
