Culture dang atangin Mizo culture-a inhruailet kan tum – Education minister

Culture dang atangin Mizo
culture-a inhruailet kan tum
– Education minister
Culture dang kan tuipui tawhna atangin naupan lai atanga Mizo culture-a inhruailet leh tumin sawrkarin zirlaibu atangin ruahmanna a siam mek tih School Education minister Lalchhandama Ralte chuan a sawi.
“Youth-20 Meet on Nationalism, Patriotism & Development” tih programme chu July 20 khan Aizawlah hman a ni a. He hun hmanpuitu School Education minister chuan changkanna leh hmasawnna tih hian mahni ram leh hnam kan changkansan ang tih a hlauhawm, tia sawiin, “Mahni tawng hre lo, ziakthiam lo, mahni tawnga biak theih loh thalai changkang lutuk kan tam ang tih a hlauhawm. Khawvel changkannain hnam a thansan ang tih a hlauhawm a, i thunlung kha i hnamah kir rawh, tih hi sawrkarin a duh leh kan inzirtir mek a ni,” a ti.
Hei vang hian elementary stage-ah mahni hnam tawnga zirtirna kalpui chu an bei mek tih sawiin, “He ram, he hnam, kan mi pawimawhte, he ramin kan neih kan pasalthate, he ramin rohlu kan neihte, he ramin kan neih kan thil mawi tak takte hlut turin thalaite zirtirna theihtawpin kan chhuah a, middle school zirlaibuah pawh kan dah a ni,” a ti.
Korean culture, Western culture, Indian culture ngaihsan a, mahni hnam, kan hnam thil ngaisang lo a awm theih tih Lalchhandama Ralte hian a sawi a. Chu zawng zawng ata hruailet kan nih theihna turin elementary stage atangin bul tan a ngai tih a sawi. Zirlaibua milem thlengin a Mizo thei ang bera dah a, Mizo hnam zia chu Mizo thalai thinlungah tuh an tum tih a sawi bawk.
He programme ah hian hriselna lam leh tunlai thiamna hman tangkai leh hman thiam kawnga zirlaite hriat tur hrilh a ni.