CWC leh JJB member thar-te inzir
Women & Child Development department buatsaihin Child Welfare Committee (CWC), Juvenile Justice Board (JJB) a chairperson leh member tharte leh District Child Protection Officer (DCPO) te tan Thawhlehni khan Aizawlah induction training neih a ni.
Hmanpuitu Mizoram State Commission for Protection of Child Rights (MSCPCR) chairperson Jimmy Laltlanmawia chuan naupangte an lo thanlen a, ram leh hnam leh khawtlang leh kohhran tan mi chenfakawm ni tura tanpui a, naupang dan nen a inrem lo leh naupang venhim ngai leh chhanchhuah ngai dinhmuna dingte tan CWC leh JJB chairperson leh member laktharte chu intathriam a, theihtawp chhuah turin a chah.
“Pangpar mawi takte hi an par chhuah hmaa an kuhmum laia ulh tliah an nih chuan an par chhuak dawn loa, chutiang bawk chuan hmabak eng tak nei naupangte hi puitling thei lo tura an nun tih chhiat a hlauhawm a; naupang tana tha ber tur zelin CWC leh JJB ten thluthlukna siam turin ka ngen che u a ni,” a ti.
2011 chhiarpuiin a tarlan danin, Mizoramah naupang, kum 18 hnuailam zaa 40 an awm a, chu’ngte hmakhua leh an lo thanlen a, khua leh tui tha ni tura kaihhruai leh venhim chu Mizoram sawrkar chuan a ngaipawimawh hle tih MSCPCR chairperson hian a sawi bawk.
CWC leh JJB member thar-te inzir
