BJP tena ram chhunga caste census an kalpui duh miah loh chungchangah Congress Working Committee (CWC) Hyderabad a thukhawmte chuan Scheduled Castes, Scheduled Tribes leh OBCs-a tuna reservation upper limit awm mek chu tihsan ni se an duh thu an sawi.
Narendra Modi sorkar chuan Constitution chu na takin khawih danglam an tum tia sawiin CWC te chuan ‘One Nation, One Election’ rawtna awm mek chu India federal sturcuture beihna tia sawiin Chief Election Commissioner leh Election Commission a commissioner dang te ruat dan tihdanglam tumna Bill pawh an dodal thu an sawi bawk.
Congress party chuan democratic forces tin te chu Modi sorkar in cooperative kalpui leh federalism principles namnul a tumna chu dodal turin an ngen bawk a.
Congress party a thuneitu sang ber te chuan India rama unemployment leh thil man sang zual zel chu an ngaihmawh takzet thu sawi bawkin CWC te chuan Prime Minister in rozgar melas (unemployment fairs) a huaihawt te chu inbumna an tihsak bawk a.
“Inflation, unemployment, growth muang, thawnchhuah tlem, chawkluh tlem kan tawng mek a, sorkar ber hian tun hmaa market distortion, import dutires tihsan leh trade distorting measures te a kalpui mek a ni. Heng hmalakna te hi India in ecnomic lama chona a hmachhawnna kawnga chhanna a ni mawlh lo” tiin Finance Minister hlui P. Chidambaram chuan a sawi.
“BJP tena Parliament chuhng leh pawna politics an kalpui dan hi tûra tuam a ni a, hate speech leh tharum thawhna, inthendarhna leh society pawhdarh tumna vek a ni,” tiin a sawi bawk a.
Loneitute leibain an khat a, agriculture leh rural economy an talbuai tia sawi bawkin CWC meeting chuan Modi sorkar chu loneitu leh loneitu pawlte hnena MSP leh demand dang an siam te tihhlawhtlin a intiam chu kalpui ngei turin an ngiat zui bawk.
Heng bakah hian CWC te chuan ‘Prime Minister thian tha Adani group te hlawk uchuakna’ leh China in Indian territory an awpna te chu JPC dina chhuichian ngei an ngiat thu an sawi bawk.
CWC te chuan Indian politics chu Bharat Jodo Yatra-in a khawih danglam tia sawiin member-te chuan Congress chief Rahul Gandhi chu Bharat Jodo Yatra 2.0 kalpui leh turin an ngen bawk.
Congress party hotu lawkte chuan Sanatana Dharma chungchanga inhnialnaah tel an duh loh thu sawi chiang zuiin Congress party chuan sakhaw tin zahna Sarvdharma Sambhav an kalpui zel dawn thu an sawi bawk a. Congress chief hlui Rahul Gandhi chuan BJP tena politics boruak siam nana an tum a nih thu a sawi laiin senior leader Digvijaya Singh chuan fimkhur turin party member te a ngen thung a. Congress Parliamentary Party chairperson Sonia Gandhi chuan constitutional values humhim chu ngaih pawimawh berah an nei zel tur a ni a ti bawk.
Congress President Mallikarjun Kharge chuan India ram chuan ‘ram chhung buaina nasa tak’ a tawng mek tia sawiin Modi sorkar chu Manipur atanga Nuh, haryana thlenga tharumthawhna tialh zawkah puhin chu chuan secular India hmelhmang a tibal takzet a ti bawk a.
“Ramin ram chhungah harsatna namen lo a tawk a ni. Khawvelin Manipur thil thleng a hre vek a. May thla atangin tharumthawhna a la thleng reng a. Modi sorkar chuan Manipur uaina chuan Nuh, Haryana a thlen a remti a ni. Heng thil thleng avang hian Rajasthan, Uttar Pradesh leh Delhi-ah pawh communal boruak a darh zau zel a ni,” tiin Kharge chuan a sawi bawk.
“Heng thil thlengte hian modern, progressive, secular India hmel a tibal a ni. Heng karah hian ruling party, communal organisation leh media thenkhatte chuan an tizualkai zawk bawk a. He ram secular fabric tihchhiatin a awm a, heng mite hi hrefiaha kan pholan an ngai a ni” tiin Congress chief chuan a sawi bawk.
Kharge chuan INDIA bloc hlawhtlinna chu Modi leh BJP leader tena an beih nasat em avangin a hlawhtlinzia a lang tiin a sawi bawk a.
“INDIA bloc Mumbai meeting zawh hnuah Enforcement Direcotrate, Income Tax department leh CBI te chu Centre sorkar chuan opposition leader te laka phuba lak nan a tirchhuak,” tiin Kharge chuan a sawi bawk.
Opposition tena sorkar policy leh performance an sawisel apiangin sorkar chuan slogan thar aupui thar ziahin ‘Atmanirbhar Bharat’, ‘US $5 trillion economy’, ‘New India 2022’, ‘Amritkaal’ leh ‘third-largest economy’ tia Modi sorkar slogan te chu ‘epmty words’ tiin a sawi bawk.
“Heng auhlate hian takna a pai lo, sorkar in inflation, unemployment leh Manipur buaina a thunun theih loh, intluktlanlohna nasa thleng mek leh loneitute leh hnathawkte dinhmun chhe zelah a hlawh chhamna khuh leh hliah nana an auhla mai mai a ni,” tiin Kharge chuan a sawi bawk.
CWC ten ONOE duhloh bur thu sawi
