Pathianni zana zawh fel tak 2026 Commonwealth Games medal tally-ah India chuan medal 39 huiin, he’ng zinga 13 hi gold medal niin, silver 17 leh bronze medal pakua a tel bawk a, a pumpuiah palina niin Games a khar.
Indian contingent-ah hian boxer-te chu medal thawhhlawk zual zingah an langsar a, medal 10 an hnek chhuah zinga pasarih lai chu gold niin, silver medal pathum an la tel bawk.
A pumpuia India palina a nih phak chhana thawhhlawk leh dangte chu track and field infiammite bakah para athlete-te an ni.
Australia bawk tuntum pawh hian chungung leh berin, medal 171 an hui zinga 70 zet chu gold niin, pahnihna England (110 medals) leh Canada (62)-te’n an dawt a; India hnuaiah a thlengtu Scotland chu pangana niin, India nen an medal lak belhkhawm (39) leh gold lak zat (13 ve ve) intluk mah se silver-a an hniam zawk avangin pangana an luah a ngai.
India tan hian gold medal lak tam lamah mipa aiin hmeichhiate’n an thawhhlawk zawk a; mipa kuta gold panga a luh laiin hmeichhiate’n pariat an hui tling a; silver leh bronze medal lak tamlamah erawh India mipate an chungnung zawk ve ve thung a ni.
Glasgow khawpuia ni 11 awh Kumpinu huam chhung baka a ram awp tawh leh awp mekte intihsiakna hunpui CWG 2026-ah khan Commonwealth sporting powerhouse pakhat ni tura Indian contingent chawisangtute zingah judo leh weightlifting pawh telin, India thiam zawng inelna chi nga ngawt – shooting, badminton, wrestling, hockey leh table tennis phei chu he Games-ah hian tel se India dinhmun hi kang lehzual tura ngaih a ni!
Games hnuhnung ber atang khan overall programme chhawk hniam a nih avangin India medal beiseina hi a hniam sa hrim hrim a, chuti chungin he Games-a ram hlawhtlingberte zinga mi an nihna an pholang zui leh thei ta tho a ni.
2030 Commonwealth Games chu Ahmedabad lamah a ni ve thung dawn a, a thlengtu nih manah India thiam thil inelna engemawzat dahluh a nih a rinawm a, Glasgow ai hian India dinhmun chu kang dawrh tura beisei a ni!
Pathianni closing ceremony-ah India rama he Games centenary edition nghahna tur inhlanchhawnna kan thlirliam a; Olympic javelin throw champion Neeraj Chopra chuan Indian Olympic Association president PT Usha leh Gujarat deputy chief minister Harsh Sanghavi kutah Commonwealth Games flag a hlan.
Ti hian, New Delhi 2010 nen Ahmedabad 2030 hi India rama Commonwelth Games tum hnih an nghahna tur chiah a ni.
CWG 2026-a palina India
